Այս մասին ասաց ՀՀ վարչապետ Նիկոլ Փաշինյանը՝ ուղիղ եթերում պատասխանելով քաղաքացու այն հարցին, թե ինչո՞ւ չեն խզում բոլոր այն պայմանագրերը, որոնք վնասում են երկրի տնտեսությանը, ենթակառուցվածքներին ու անվտանգությանը:

 

 

Պատասխանելով հաջորդ հարցին, թե ինչո՞ւ չեն մաքրում պետական ապարատը բոլոր այն մարդկանցից, որոնք իրենց գործունեությամբ վնաս են հասցնում երկրի անվտանգությանը և տնտեսությանը, Փաշինյանը նշեց. «Շատ դեպքերում մենք կարող ենք ազատվել մարդկանցից, բայց ես հիմա չեմ խոսում ապապետական մարդկանց մասին, որովհետև այդ կատեգորիայի հետ կապված մեր վերաբերմունքը միանշակ է՝ նրանք պետք է դուրս բերվեն պետական կառավարման համակարգից: Բայց կան նաև մարդիկ, ովքեր չարամիտ չեն կամ հոգնած, կամ նրանց հմտությունները ժամանակակից պայմաններին բավարար չեն, և, այո, կարող են չաշխատել: Ի դեպ, պետական համակարգում բազմաթիվ թափուր աշխատատեղեր կան, ինչո՞ւ են թափուր, որովհետև այդ աշխատանքը գրավիչ չէ, աշխատավարձերը շատ ցածր են, և եթե նույնիսկ մենք այդ աշխատատեղերում հնարավորություն ենք ունենում մարդիկ ներգրավել, միշտ չէ, որ կարողանում ենք այդ պաշտոնի համար անհրաժեշտ ամենաբարձր որակավորում ունեցող մարդկանց ներգրավվել, այդ թվում՝ աշխատավարձի պատճառով»:

 

Նիկոլ Փաշինյանը նաև նկատեց՝ պետք է պետական համակարգում աշխատանքի գրավչությունը և պատասխանատվությունը մեծացնենք. «Դիմումներ կան, որ տարիներով պտտվում են ու այդպես էլ լուծում չեն գտնում, ու շատ դեպքերում այնպես չէ, որ չեն ուզում լուծել, այլ իմացության բացակայության պատճառով չեն կարողանում դրանք լուծել»:

 

Ըստ վարչապետի՝ 2018 թվականից ի վեր իրենց ուղղված ամենամեծ մեղադրանքն այն էր, որ այս Կառավարությունը կառավարչական հմտություններ չունի:

 

«Կարծում եմ, որ այն, ինչպես մեր Կառավարությունը, ՏԻՄ մարմինները, իհարկե, նաև կամավորների և միջազգային կազմակերպությունների աջակցությամբ կառավարեցին այդ հումանիտար ճգնաժամը՝ ԼՂ-ից բռնի տեղահանված մեր քույրերի և եղբայրների, ամբողջ աշխարհն է զարմացած, ասում են՝ էդ ո՞նց է դա հնարավոր մի շաբաթում 100 հազարից ավելի մարդ ընդունել առանց փախստականների ճամբարների, առանց վրանային ավանների, առանց փողոցներում քնող մարդկանց և այդպես շարունակ: Այս հարցին իմ արձագանքը մեկն է՝ երկու բանի շնորհիվ ենք մենք դա կարողացել անել. առաջինը՝ մեր ժողովրդի մենթալիտետի առանձնահատկությունների, երկրորդը՝ ժողովրդավարական այն բարեփոխումների շնորհիվ, որոնք ՀՀ-ում մեծացրել են, բարձրացրել կառավարման որակը և արդյունավետությունը»,- ասաց վարչապետը:

 

Աղբյուր՝ armtimes.com