«Ես կարծում եմ, որ Ադրբեջանի նախագահի չներկայանալը միայն իրենով չի պայմանավորված, իրենք ունեն պայմանավորվածություններ այլ կենտրոնների հետ և իրենց հետ համաձայնեցնելով` չեն գնում այդ հանդիպումներին ու մերժում են Արևմուտքի առաջարկները՝ միայն ընդունելով ռուսական հարթակը»,- Civic.am-ի հետ զրույցում նշեց ԱԺ «Քաղաքացիական պայմանագիր» կուսակցության պատգամավոր Ռուստամ Բաքոյանը՝ պատասխանելով հարցին, թե ի՞նչն է պատճառը, որ Ալիևը խուսափում է արևմտյան հարթակներում բանակցություններից և չի ստորագրում Գրանադայում ձեռք բերված պայմանավորվածությունների փաստաթղթի տակ։

Բաքոյանի խոսքով՝ Ռուսաստանի շահերն այսօր չեն համընկնում Հայաստանի հետ, և դա է պատճառը նաև, որ ռուս խաղաղապահները ձախողել են իրենց պարտավորությունների կատարումը ԼՂ-ում․ «Մենք կարող ենք երկու ուղղությամբ մտածել՝ առաջինը, որ չեն ցանկացել և պայմանավորվածությունների մեջ էր այդ չցանկանալը, իսկ երկրորդը՝ որ չեն կարողացել։ Եթե մի տարբերակը վատն է, ապա մյուսը ավելի վատն է։ Այն, ինչ տեղի է ունեցել ռուս խաղաղապահների թողտվությամբ, պայմանավորվածությունների արդյունք է»։

Անդրադառնալով ՌԴ ԱԳՆ խոսնակ Մարիա Զախարովայի հայտարարությանը, թե Նախիջևանի ու Ադրբեջանի միջև տրանսպորտային կապը ՀՀ-ի տարածքով պետք է վերահսկի ՌԴ ԱԴԾ ծառայությունը՝ Բաքոյանն ասաց․ «Մեր արտաքին գործերի նախարարությունը ի պատասխան հնչեցրել է, որ մենք որևէ փաստաթղթով որևէ տեղ չենք արձանագրել, որ ՀՀ-ի սուվերեն տարածքով կարող է ճանապարհ անցնել երրորդ երկրի վերահսկողությամբ»։

Բաքոյանը խոսելով ՀՀ-ի և արևմտյան մի շարք երկրների միջև հարաբերությունների զարգացման մասին՝ նշեց․ «ՌԴ-ի հանդեպ մեր վստահությունը չի արդարացվել և մենք որպես անկախ պետություն՝ կարող ենք հարաբերություններ հաստատել աշխարհի տարբեր երկրների՝ հետ ՀՀ-ի անվտանգությունը պաշտպանելու համար»։

Դավիթ Լևոնյան

 

Աղբյուր՝ civic.am