Այս մասին երեկ Հանրային հեռուստաընկերության եթերում ասել է «Հանրապետություն» կուսակցության նախագահ Արամ Սարգսյանը՝ խոսելով «Հայաքվե» նախաձեռնության և դրա հեղինակների մասին:

 

 

«Այն գործընթացը, ինչ իրենք սկսել են, դրանով թշնամանք են սերմանում Հայաստանի ու Արցախի մեջ: Ասում են՝ արցախցիներ, տեսե՛ք, դուք այդ նեղ վիճակում ապրում եք, իսկ հայերը չեն ուզում նույնիսկ գալ ստորագրել, որ դեմ են, որ Արցախը անկախ լինի: Կարծես «ժողովրդավարական» պրոցես են սկսել էն ժամանակ, որ ընտրություններ էին կեղծում, այդ ուժերը, ում դրոշները տնկած են այդ «Հայաքվե»-ի հետևում»,- ասել է Սարգսյանը:

Դիտարկմանը, որ քաղաքացիական նախաձեռնություն է, վերջինս արձագանքել. «Այդ մեյմունությունները, ասել Վանո Սիրադեղյանի, թող պահեն ուրիշ տեղ, բոլորն էլ գիտեն, թե դրա թիկունքում ովքեր են կանգնած, և դրա համար էլ ստորագրություններ չեն հավաքվում»:

Քաղաքական գործիչը նաև նկատել է՝ ասում են՝ այ, որ ստորագրես, կդառնաս հայ. խնդիրը ժողովրդավարական է, բայց ռասիստական մոտեցմամբ:

«Ես էլ ասում եմ՝ ես արդեն իսկ հայ եմ, բայց ես ո՛չ եմ ասում «Հայաքվե»-ին, որովհետև պրոբլեմ են առաջացնում և պատրվակ են տալիս Ադրբեջանին, որ Ադրբեջանն ասի՝ տեսե՛ք, նույնիսկ Հայաստանում ապրող հայերը այլևս Ղարաբաղը չեն ուզում տեսնել անկախ: Անցել է մեկ շաբաթ, իրենք 50 հազար ստորագրությունից 15 հազարն են հավաքել, և ես կարծում եմ՝ եթե այդ անձնագրերը ստուգես, տակը շատ քիչ բան կմնա: Այդ 50 հազարը կհավաքե՞ն, թե՞ չէ, դա շատ մեծ խնդիր է, բայց եթե չհավաքեն, գիտեք՝ ինչ մեծ վնաս է տալու: Նույն Ադրբեջանն ասելու է՝ Հայաստանում նույնիսկ 50 հազար մարդ չգտնվեց, որ ասի՝ ԼՂ-ն չպիտի լինի Ադրբեջանի մաս»,- ընդգծել է նա:

Ըստ Սարգսյանի՝ ենթադրենք՝ հավաքվեց 50 հազար ստորագրություն, գնաց ԱԺ, բնականաբար, Ազգային ժողովը դրան դեմ է քվեարկելու, որից հետո իրենք 300 հազար քվե պետք է հավաքեն, ինչը չլինող բան է. «Այդ գործընթացը վնաս է տալու և՛ Հայաստանին, և՛ Արցախին, դա օգնություն է Ադրբեջանին, որ ասեն՝ տեսե՛ք, հայերը իրենք էլ են հրաժարվել ԼՂ-ից: Իրենց էլ հերթական պարտությունն է լինելու, ինչքան կարող է ընդդիմությունը անընդհատ պարտվի: Էս ընդդիմությունը եկած օրվանից մի բան է ասում՝ ուզում եմ իշխանությունները փոխվեն, բանակցողը փոխվի, բանակցողը փոխվի, ի՞նչ է ասելու: Իրենք ինչ են առաջարկում, ասում են՝ դուք գնացեք՝ մենք գանք ձեր տեղը լուծենք խնդիրը, ո՞նց...

 

Վարդան Օսկանյան, 100-ից ավելի բանակցություն ես վարել, եկել ասում ես՝ ինձ նշանակեք: Սա ծիծաղելի է ու անլուրջ, այս ամեն ինչը քաղաքականությունն այնքան է անլրջացնում, որ քաղաքական գործունեություն ծավալելը Հայաստանում դառնում է պարսավանքի առարկա, և դրա համար է, որ ՀՀ քաղաքացիները քաղաքական գործիչներին չեն հարգում»:

 

Աղբյուր՝ armtimes.com