Թուրքիան այն երկիրը չէ, որտեղ ընտրությունների արդյունքներն իրենց արտաքին հարաբերությունների վրա էական ազդեցություն են ունենում։

 

Այս մասին այսօր խորհրդարանական ճեպազրույցների ժամանակ ասաց «Քաղաքացիական պայմանագիր» խմբակցության պատգամավոր, ԱԺ տնտեսական հարցերի մշտական հանձնաժողովի նախագահ Բաբկեն Թունյանը։

 

 

«Երբ մեզ մոտ ասում են՝ բանակցողին փոխեք, անձն է կարևոր, դա միֆ է, որովհետև երկրները առաջնորդվում են ինստիտուցիոնալ վարքագծով։ Չեմ կարծում, որ իրենց մոտ այդ մոտեցումները փոխվելու են։ «Զանգեզուրի միջանցք»-ի մասին, երբ լսում եմ թուրք-ադրբեջանական ղեկավարների կողմից, ինձ մոտ վատ հիշողություններ են առաջանում, որովհետև այդ թեզը տիրաժավորել է Հայաստանի ընդդիմությունը»,- ասաց նա։

Նրա խոսքով՝ չկա «Զանգեզուրի միջանցք», իսկ Սյունիքի ճանապարհով անցնելու հարցը և իր հարևաններին տրանսպորտային երթևեկություն ապահովելը ՀՀ օրենսդրությամբ և առանց սուվերենության խախտման Հայաստանը պատրաստ է տրամադրել. «Այդ արտահայտությունը թուրք-ադրբեջանական օրակարգ է, մենք ավելորդ տիրաժավորում ենք այդ թեզը, երբ խոսում ենք դրա մասին»:

«Քաղաքացիական պայմանագիր» խմբակցության պատգամավոր, տնտեսական հարցերի մշտական հանձնաժողովի անդամ Գևորգ Պապոյանն էլ իր հերթին նկատեց՝ «Զանգեզուրի միջանցք» արտահայտությունը շրջանառության մեջ է դրել Ադրբեջանի նախագահը, և որի ու Հայաստանի ընդդիմության համագործակցության արդյունքում այն դարձել է տերմին։

«Ալիևը իր հարցազրույցներում ընդունում է, որ ոչ մի տեղ գրված չի այդ միջանցքի մասին, իսկ ՀՀ ընդդիմությունն այդ տերմինը մտցրել է ներքաղաքական օրակարգ, ինչպես նաև այդ միջանցքի վերաբերյալ պայմանավորվածությունների մասին կեղծ թեզեր են տարածում»,- նկատեց նա:

 

Աղբյուր՝ armtimes.com