Հայաստանի ԱԳՆ հայտնել է, որ Բրյուսելում Եմ Արեւելյան գործընկերության ծրագրի արտգործնախարարների հավաքի շրջանակում Ադրբեջանի արտգործնախարարի հետ հանդիպում նախատեսված չէ: Ըստ ամենայնի, այդ հանդիպման հնարավորությունը «պահվում» է Վաշինգտոնի համար, որի թերեւս շոշափելի մասնակցությամբ հղացել է հայտնի «բարի կամքի» համատեղ հայտարարությունը: Դափնին պատկանում է Վաշինգտոնին, իսկ Բրյուսելը ըստ էության բավարարվում է հարակից դերով: Այդպես էր նախորդ դեպքերում: Մայիսի սկզբին Վաշինգտոնում տեղի ունեցավ արտգործնախարարների քառօրյա բանակցություն-մարաթոն, որից հետո մայիսի 15-ին տեղի ունեցավ Փաշինյան-Ալիեւ հանդիպում Բրյուսելում: Հունիսի վերջին տեղի ունեցավ եռօրյա արտգործնախարարական բանակցություն Վաշինգտոնում, որից մի քանի օր անց՝ հուլիսի 15-ին տեղի ունեցավ Փաշինյան-Ալիեւ հանդիպում Բրյուսելում: Այժմ թերեւս մեծ հավանականություն ունի «մոդելի» կրկնությունը:

 

Հայաստանի ԱԳՆ արդեն իսկ հայտարարել է, որ հավանություն տվել է Վաշինգտոնում հանդիպման գաղափարին: Բոլորին իհարկե հետաքրքրում է խաղաղության պայմանագրի կնքման հավանականությունը: Դա բավականին փոքր է: Ասել, թե բացառվում է, իհարկե թերեւս չի լինի ճիշտ, եւ ի վերջո առնվազն մտադրությունների վերաբերյալ ավելի տարողունակ եւ բարձր մակարդակի փաստաթուղթ, քան «բարի կամքի» համատեղ հայտարարությունն էր՝ հնարավոր է: Ի վերջո հնարավոր է, որ այդ հայտարարության մեջ նախանշվող՝ վստահության միջավայրի կառուցման վերաբերյալ շարունակությունը լինի հենց այդպիսին, այսինքն հաջորդ հայտարարությունը լինի Փաշինյանի եւ Ալիեւի անմիջական անունով:

 

Սակայն դա բոլորովին չի լինի խաղաղության իրական պայմանագիր կամ համաձայնագիր, եթե անգամ ունենա այդպիսի անուն՝ ինչը եւ շատ, շատ քիչ հավանական է: Ամբողջ հարցն այն է, որ ռեգիոնում պայքարը ուժային խոշոր կենտրոնների միջեւ շարունակվում է, ինչի վկայությունն այն է, որ Ադրբեջանի փոխվարչապետը նախօրեին Մոսկվայում բանակցել է Ռուսաստանի փոխվարչապետի հետ: Ադրբեջանից Մոսկվա մեկնել է Շահին Մուստաֆաեւը, որը մի քանի օր առաջ հայ-ադրբեջանական պետական սահմանին հանդիպել էր Հայաստանի փոխվարչապետ Մհեր Գրիգորյանի հետ: Մոսկվայում իհարկե ըստ պաշտոնական հաղորդագրության քննարկվել է ոչ թե հայ-ադրբեջանական խնդիրը, այլ Ադրբեջանի տարածքով Հյուսիս-հարավ երթուղուն վերաբերող հարցեր, որոնք ներառում են նաեւ Իրանը:

Ի դեպ նախօրեին Իրանի նախագահն էր Մոսկվայում եւ նշվում էր, որ երկարատեւ հանդիպում է ունեցել Պուտինի հետ: Զուգահեռ, Հունաստանում էր Թուրքիայի նախագահ Էրդողանը, որի վերադարձից հետո տեղի է ունեցել հեռախոսազրույց Հայաստանի եւ Հունաստանի արտգործնախարարների միջեւ: Այդպիսով, ռեգիոնում աշխուժոորեն շարունակում է պտտվել աշխարհաքաղաքական «մաքոքը», իսկ քանի դեռ այն չի դրսեւորել կանգառի միտումներ կամ առնվազն պտույտների դանդաղեցման միտում, բավական դժվար է խոսել խաղաղության՝ իրական եւ գործնական խաղաղության միտման մասին, ցավոք սրտի: Ըստ այդմ, պետք է աշխատել խաղաղության ուղղությամբ, բայց նաեւ հենց այդ աշխատանքի շրջանակում պատրաստ լինել պատերազմի, ինչպես բավականաչափ հայտնի «բանաձեւով» է:

 

Հեղինակ՝ Հակոբ Բադալյան

Աղբյուր՝ 1in.am