Հայաստանի անվտանգության խորհրդի քարտուղարն ու Իրանի Ազգային անվտանգության խորհրդի քարտուղարը նոյեմբերի 14-ին հեռախոսազրույց են ունեցել, որի մասին հայկական կողմի հաղորդագրությունը բավականին համառոտ է՝ քննարկվել են երկկողմ տնտեսական հարցեր: Սակայն, այդ ձեւակերպումն ավելի շատ թողնում է տպավորություն, որ դրաննով փորձ է արվել հեռախոսազրույցը «պաշտպանել» քաղաքական գնահատումներից: Համենայն դեպս, ներկայիս ռեգիոնալ եւ միջազգային իրողություններն այնպիսին են, որ հազիվ թե Հայաստանի եւ Իրանի ԱԽ քարտուղարների զրույցը պարունակեր տնտեսական նպատակներ: Կամ, եթե կան այդպիսիք, ապա դրանք շոշափելիորեն առնչվում են քաղաքականությանը, իսկ այս պարագայում թերեւս՝ ռեգիոնալ հաղորդուղիներին առնչվող օրակարգերի:

 

Հատկանշական է, որ Իրանի եւ Հայաստանի ԱԽ քարտուղարների հեռախոսազրույցը տեղի է ունենում այն օրը, երբ Հայաստանի ԱԳ նախարարը մեկնում է Լոնդոն, որտեղ նաեւ տեղի է ունենալու Հայաստան-Բրիտաինա ռազմավարական երկխոսության առաջին նիստը: Ի դեպ, մեկ այլ ուշագրավ հանգամանք է այն, որ այսօր տեղի է ունեցել Մեծ Բրիտանիայի արտաքին գործերի նախարարի փոփոխություն: Ջեյմս Կլեվերլին, որ զբաղեցնում էր այդ պաշտոնը, նշանակվել է ներքին գործերի նախարար, այն բանից հետո, երբ նախկին նախարարը հրաժարական է տվել պաղեստինամետ բողոքի ցույցի մասնակիցների հանդեպ անհարգալից գնահատականների համար: Առավել հետաքրքիր է այն, որ Ջեյմս Կլեվերլիի փոխարեն արտգործնախարար է նշանակվել Դեվիդ Կեմերոնը՝ Բրիտանիայի նախկին վարչապետներից մեկը, որը վարչապետի պաշտոնը զբաղեցրել է 2010-16 թվականներին: Նրա պաշտոնավարման ընթացքում է անկցկացվել ի դեպ Եվրամիությունից Բրիտանիայի դուրս գալու մասին հանրաքվեն, արժանանալով հավանության

 

Կեմերոնն իր նշանակման առնչությամբ հայտարարել է, որ հուսով է, որ իր փորձառությունը կօգնի Բրիտանիային առկա մարտահրավերները հաղթահարելու հարցում: Կասկածից վեր է, որ այստեղ իհարկե նախկին վարչապետի խոսքի համատեքստում այն զարգացումներն են, որ այսօր ծավալվում են Մերձավոր Արեւելքում, եւ որի «ավազանում» է նաեւ Կովկասը: Այդ իմաստով ուշագրավ է, որ Հայաստանի արտգործնախարարի բրիտանական այցի ֆոնին տեղի է ունենում Թեհրան-Երեւան հեռախոսազրույց Անվտանգության խորհուրդների քարտուղարների մակարդակով, թեեւ անշուշտ սա ֆոնային մի դրվագն է միայն: Ընդհանուր առմամբ այսօր ռեգիոնալ լայն իմաստով իրադրությունը այնպիսին է, որ Երեւանն ու Թեհրանն ունեն խոսակցության բավականին հարուստ օրակարգ:

Ի դեպ, այդ իմաստով խիստ հատկանշական է եւ այն, որ հենց Հայաստանի ԱԽ քարտուղարի հոկտեմբերի սկզբին Իրան կատարած բավականին հագեցած եւ ներկայացուցչական՝ ընդհուպ նախագահ Ռեյիսիի ընդունելության մակարդակկով այցի ընթացքում էր հնչել Հայաստան-Ադրբեջան սահմանին դիտորդ տեղակայելու Իրանի պատրաստակամության մասին միտքը, որ ըստ իրանական լրատվամիջոցների արտահայտել էր Իրանի ԶՈՒ ԳՇ պետը: Ի դեպ, արդյո՞ք Հայաստանի եւ Իրանի ԱԽ քարտուղարերի հեռախոսազրույցի ընթացքում կարող էր անդրադարձ կատարված լինել այդ մտքին, հաշվի առնելով եւ այն մտքերը, որ այս օրերին հնչում են Բաքվից: Մասնավորապես, թե Իլհամ Ալիեւը, թե Ռեջեփ Էրդողանը վերջին երկու շաբաթների ընթացքում տարբեր հարթակներում մի քանի անգամ խոսել են Ադրբեջանի հանդեպ Հայաստանի իբրեւ թե «պարտավորությունների կատարման» անհրաժեշտության մասին: Միեւնույն ժամանակ, ուշադրության է արժանի, որ Իրանի նախագահ Ռեյիսին օրեր առաջ Ուզբեկստանի մայրաքաղաք Տաշքենդում Տնտեսական գործակցության կազմակերպության Վեհաժողովի շրջանակում հանդիպել էր թե Էրդողանի, թե Ալիեւի հետ:

 

Հեղինակ՝ Հակոբ Բադալյան

Աղբյուր՝ 1in.am