Ռոբերտ Քոչարյանի որդի Լեւոն Քոչարյանը կվերցնի՞ իրեն բաժին հանված պատգամավորի մանդատը, թե՞ հոր՝ Քոչարյան ավագի պես կհրաժարվի դրանից, պարզ կդառնա առաջիկա օրերին։ Իսկ մինչ այդ, եկեք դիտարկենք, թե ինչ «առողջական վիճակում» է այժմ Քոչարյան ավագի քաղաքական պրոյեկտ «Հայաստան» խմբակցությունն ու ինչ հեռանկար է խոստանում որդի Քոչարյանին այդ խմբակցության անդամ դառնալը։

 

Պրոյեկտը խորհրդարանում է արդեն ավելի քան երկու տարի, ընդդիմության կարգավիճակով, սակայն որպես խորհրդարանական կառավարման երկրի ինստիտուցիոնալ ընդդիմություն հաջողել է միայն մի բանում՝ սեփական ռեյտինգի «քոքը» մինչեւ վերջ մաշեցնելուն։ Եվ սա այն դեպքում, երբ ընտրապայքարի մեջ էր մտել ընտրություններում «կրելու» համոզվածությամբ, մինչդեռ մեկ տարի առաջ այս օրերին գուժեց իր փլուզման մասին։ Դաշինք, որպես այդպիսին, այլեւս գոյություն չունի, կա քաղաքական առումով անկայուն մի խմբակցություն, որը առաջին տեղում է իր անդամների՝ մանդատները վայր դնելու գծով։ Խմբակցություն, որի անդամներից ոմանք այս ընթացքում ենթարկվել են քրեական հետապնդման, կալանք կրել, ապա որոշել հեռու մնալ «շառից-փորձանքից»՝ վայր դնելով իրենց մանդատները։ 

 

Խմբակցություն, որտեղ գերիշխում են ՀՅԴ-ականները եւ նրանց թվային կազմով զիջող անկուսակցականները, որոնք անգամ քվորում չեն կարող ապահովել քաղաքական որեւէ նախաձեռնություն գլուխ բերելու, օրենքի նախագիծ, հայտարարություն ընդունելու համար։ Հիշեցնենք, թե ինչպես ձախողվեց ՀՀ վարչապետին անվստահություն հայտնելու գործընթաց սկսելը։ Արդ, մանդատը վերցնելով՝ այս՝ մաշված հեղինակությամբ խմբակցության անդամ դառնալը ի՞նչ «հավելյալ արժեք» է ստեղծելու Քոչարյան կրտսերի համար՝ բացի, իհարկե, պատգամավորական անձեռնմխելիությամբ օժտելը։

 

Որդի Լեւոնը, որը հայտնի է իր բիզնես գործունեությամբ, վերջին տարիներին էլ մկաններն աճեցնելով (նա ՀՀ ուժային եռամարտի ֆեդերացիայի նախագահն է, Հայաստանի հավաքականի կազմում 2019-ին մասնակցել է Բելառուսում կայացած ուժային եռամարտի Եվրոպայի գավաթին եւ արծաթե մեդալ նվաճել) պատգամավոր դառնալով ու Գեղամ Մանուկյանի եւ կամ Ագնեսա Խամոյանի կարգավիճակում ԱԺ գալով, ի՞նչն է փրկելու եւ ո՞ւմ։

 

Նշենք, որ հիշյալ խմբակցության քարտուղար Արծվիկ Մինասյանը հայտարարել է՝ «եթե Լևոն Քոչարյանը ցանկություն հայտնի վերցնել մանդատը, ապա ՀՀ Սահմանադրական դատարանի՝ 2021 թ. որոշման համաձայն՝ նոյեմբերի 6-ին ՀՀ կենտրոնական ընտրական հանձնաժողովը պետք է մանդատ շնորհի նրան, որից հետո նա պետք է անհապաղ ազատ արձակվի կալանավայրից, ներկայանա ԱԺ հաջորդ նիստին ու տա պատգամավորական երդում»։  

 

Քրեական հետապնդման ենթարկվող, այժմ կալանքի տակ գտվող Քոչարյան կրտսերը, նկատենք, քաղաքականության մեջ «չոչ անել» սկսեց մասնավորապես 44-օրյա պատերազմից հետո, երբ հայրը որոշեց ուղղել 2018-ին հայ ժողովրդի թույլ տված «սխալը»՝ Սերժ Սարգսյանին մերժելն ու թավշա հեղափոխությամբ նրան տուն ուղարկելը, եւ վճռեց վերցնել իշխանությունը՝ ռեւանշի հասնելու ժողովրդի կամքի նկատմամբ։ Մինչդեռ ժողովու՛րդը ռեւանշի հասավ իր նախկին նախագահի նկատմամբ՝ վերահաստատելով 2018-ի ապրիլի որոշումը։

 

Որդի Լեւոնը, նկատենք, ընտրությունների նախընտրական փուլում հարցազրույց էր տվել լրատվամիջոցներից մեկին եւ հարցին՝ «Դուք իսկապե՞ս ուզում եք պատգամավոր դառնալ, թե՞ ցուցակում Ձեր ներկայությունը լեգիտիմացնում է Ձեր մուտքը քաղաքական դաշտ», պատասխանել էր․ «Եթե մի քանի տարի առաջ ինձ մեկն ասեր, որ ես հնարավոր է ընդգրկված լինեմ որեւէ նախընտրական ցուցակում, դա կընկալեի հումորով: Սակայն վերջին տարիների իրադարձությունների ընթացքը բերեցին նրան, որ այժմ հեռու մնալը սխալ կլիներ: Նպատակը, իհարկե, պարզապես պատգամավորի մանդատ ունենալը չէ, այլ ամեն գնով մեր երկրում իրական փոփոխություն բերելն է, որն ունակ է անել մեր թիմը: Իսկ 50-րդ տեղը համարում եմ բավական բարեհաջող՝ հաշվի առնելով նաեւ «Հայաստան» դաշինքի օրեցօր աճող վարկանիշը»:

 

Փաստորեն, Լեւոն Քոչարյանը ախորժակ էր պահել ԱԺ մտնել, բայց միայն երկու տարի անց է այդ ախորժակը բավարարելու հնարավորություն ստեղծվել, այն էլ՝ իրենից առաջ գտնվող պատգամավորի թեկնածուների ինքնաբացարկների շնորհիվ։ Ինչեւէ։

 

Վերջին նախադասությունը՝ ««Հայաստան» դաշինքի օրեցօր աճող վարկանիշը», հարցազրույցից երկու տարի անց քմծիծաղ է հարուցում, քանի որ ականատեսն ենք այս քաղաքական պրոյեկտի՝ օրեցօր՝ «քոքից» անդին նվազող վարկանիշին։ Հետեւապես Քոչարյանի պես սպորտսմեն տղան պետք է մի կողմ դնի հումորն ու լրջորեն ծանրութեթեւ անի՝ արդյո՞ք իրեն պատիվ կբերի դրա անդամը դառնալը։ Հետո ինչ, որ «պապայի պրոյեկտն» է։ Բայց, ինչպես հայտնի է, ՀՀ-ում 2018-ից սկսած՝ առանձնահատուկ վերաբերմունք է ցուցաբերվում «ընտրություն» հասկացության նկատմամբ, հետեւապես՝ ընտրությունը Լեւոն Քոչարյանինն է, եւ նրա ցանկացած ընտրության պետք է վերաբերվել հարգանքով եւ ընդունել ի գիտություն։

 

«Թանկարժեք տղան»  

 

Իսկ մինչ այդ, տեսենք, թե ինչ ունեցվածքի տեր պոտենցիալ պատգամավորի թեկնածուի հետ գործ ունի հայ ժողովուրդը։ Լեւոն Քոչարյանը, ըստ կարգի, ԿԸՀ էր ներկայացրել իր հայտարարագիրը, դատելով որից՝ «թանկարժեք տղա» է․ «թանկարժեք» ասելով՝ նկատի ունենք թանկ արժեք ունեցող գույք տնօրինող։

 

Որպես անշարժ գույք որդի Քոչարյանը Երեւանի կենտրոնի «պրեստիժնի» փողոցներից մեկում՝ Աբովյանում, մեկ բնակարան է հայտարարագրել՝ 226 ՔՄ մակերեսով, նույն փողոցում գտնվող՝ 20 ՔՄ մակերեսով, մեկ ավտոտնակ, Վազգեն Սարգսյան փողոցում գտնվող՝ 203 ՔՄ տարածքով, գրասենյակ։ Որպես շարժական գույք Քոչարյանը հայտարարագրել է «2013թ․TOYOTA RAV 4 2.5» եւ 2019 թ․ TOYOTA CAMRY 3.5 P» ավտոմեքենա։ Որպես եկամուտ կրտսեր Քոչարյանը հայտարարագրել է «Նաիրի Ինշուրանս»-ից ստացած 604 մլն 200 հազար դրամ շահույթը, եւ աշխատավարձը՝ 17 մլն 604 հազար դրամ։ Ինչպես նաեւ՝ «Մենեջմենթ սիսթեմզ ինթերնեշնլ»-ից վարձակալության դիմաց ստացած 14 մլն 997 հազար 775 դրամ։

 

Հայտարարագիրը ներկայացնելու օրվա դրությամբ նա ունեցել է 161 մլն 280 հազար 640 դրամ եւ 395 հազար 459 ԱՄՆ դոլար։ Քոչարյանն ունի բաժնեմասեր հետեւյալ ընկերություններում՝ «Նաիրի ինշուրանս»՝ 60 տոկոս, «Զեմկոմինվեստ»՝ 50 տոկոս, «Սփեյս մենեջմենթ»՝ 33,3 տոկոս եւ 0,70 տոկս բաժնետոմս՝ «Էքզել աութդորս»-ում։ 

 

Թե քանի՜ տոննա հալալ քրտինք է թափել նոյեմբերի 16-ին 38-ամյակը բոլորող Լեւոն Քոչարյանը նման ունեցվածքի տիրանալու համար, պետք է պարզեն ապօրինի գույքի բռնագանձման հարցերով զբաղվող մարմինները։ Պրոցեսն սկսված է՝ ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչության դիմումի հիման վրա՝ Հակակոռուպցիոն դատարանի 2023 թվականի հուլիսի 13-ի որոշմամբ, հիշեցնենք, հայցի նախնական ապահովման միջոցներ են կիրառվել Ռոբերտ Քոչարյանի եւ նրան փոխկապակցված յոթ անձի (ընտանիքի անդամներ՝ կին, զավակներ, նրանց ամուսիններ) գույքի նկատմամբ։ Այնպես որ, «Հայաստան» խմբակցության պատգամավորացուն համալրելու է ապօրինի ծագում ունեցող գույք տնօրինող պատգամավորների ցանկը՝ խմբակցության ղեկավար Սեյրան Օհանյանի գլխավորությամբ։   

 

Դատախազության կողմից նախնական ուսումնասիրության արդյունքում ապօրինի է դիտարկվել և ապահովման միջոց կիրառվել 20 անշարժ գույքի նկատմամբ, որոնց թվում՝ Տերյան, Աբովյան, Պարոնյան փողոցներում, Հյուսիսային պողոտայում գտնվող շենքեր, բնակարաններ, ավտոկայանատեղիներ և հասարակական նշանակության տարածքներ, ինչպես նաեւ Ծաղկաձորում գտնվող հանգստյան տուն, Իսակովի պողոտայում գտնվող 2 անշարժ գույք:

 

Աղբյուր՝ armtimes.com