Հակակոռուպցիոն կոմիտեի նախագահ Սասուն Խաչատրյանի խոսքով՝ «Մարտի 1»-ը բացահայտվել է:

 

Այս մասին այսօր ԱԺ-ում լրագրողների հետ զրույցում ասաց նա։

 

Հարցին՝ այդ դեպքում ո՞վ է հրահանգել գնդակահարել 10 անձանց, վերջինս պատասխանեց․ «Մարտի 1-ի գործով մեղադրական եզրակացությունն արդեն հասանելի է, կարող եք վերցնել, նայել։ Մեր եզրահանգումները, ապացույցները շարադրված են, մեղադրանքներ են առաջադրվել և՛ հրաման տվողներին, և՛ սահմանադրական կարգը տապալողներին, պարզապես, ՍԴ որոշումից հետո կոռեկտ չէ, որ ես այլ բան հայտնեմ»:

 

Ինչ վերաբերում է «Մարտի 1»-ի քրեական գործի շրջանակներում Զաքար Հովհաննիսյանին դիտավորությամբ կյանքից զրկելու համար մեղադրյալի կարգավիճակ ստացած ոստիկանության զորքերի հրամանատարի նախկին տեղակալ, նախկին շտաբի պետ Գեղամ Պետրոսյանի նկատմամբ քրեական հետապնդումը դադարեցնելուն, Խաչատրյանն ասաց, թե դա նորմալ երևույթ է. «Պետրոսյանի նկատմամբ քրեական հետապնդումը դադարեցվել է, քանի որ ապացուցվել է, որ նա չի կատարել իրեն մեղսագրվող արարքը»:

 

Դիտարկմանը, թե նման ձախողման համար այն մարմնի ղեկավարը, որը քննում էր գործը, հրաժարական կտար, Սասուն Խաչատրյանը ընդգծեց, որ իրենք աշխատում են շատ բարեխիղճ․ «Զարգացած ժողովրդավարական երկրներում արդարացված դատավճիռներ էլ են լինում»։

 

Աղբյուր՝ armtimes.com