Հայաստանի անվտանգության խորհրդի քարտուղարն ընդունել է Հայաստանում Իրանի նորանշանակ դեսպան Մեհթի Սոբհանիին: Քննարկվել են երկկողմ գործակցության հեռանկարներին և հետաքրքրություններին առնչվող հարցեր: Այդ հանդիպումը սակայն հատուկ ուշադրություն է գրավում այն պատճառով, որ Հայաստանի ԱԽ քարտուղարը դրա նախօրեին հեռախոսազրույց էր ունեցել իրանցի իր գործընկերոջ հետ: Օգոստոսի 7-ին տեղի ունեցած այդ հեռախոսազրույցից հետո՝ օգոստոսի 8-ին, ԱԽ քարտուղար Գրիգորյանը հյուրընկալում է Հայաստանում Իրանի նորանշանակ դեսպանին:

 

Դա զուտ ժամանակացուցային հաջորդականությու՞ն է, թե՞ այդ ժամանակացույցը պայմանավորված է հենց նրանով, որ նախօրեին տեղի է ունեցել հեռախոսազրույց Իրանի ԱԽ քարտուղարի հետ և այն ունեցել է բովանդակություն, որի շարունակության անհրաժեշտությամբ էլ պայմանավորված է եղել հաջորդ օրը տեղի ունեցած հանդիպումը Իրանի դեսպանի հետ: Հայ-իրանական օրակարգի ներկայիս կարևորագույն, առանցքային թեման անշուշտ անվտանգությունն է: Դա իհարկե օրակարգի միակ թեման չէ և չի կարող լինել, օրակարգը և ներուժն առավել հարուստ ու լայն է, սակայն ներկայումս անվտանգային հարցերը օպերատիվ առաջնահերթություն են, նկատի ունենալով ռեգիոնալ իրավիճակը, դրան զուգորդող միջազգային ֆոնը, նաև Ադրբեջանի ագրեսիվ հռետորաբանությունն ու խաղաղության շուրջ խոսակցությունը փակուղի մղելու գործողությունները:

 

Ռեգիոնալ կայունության և անվտանգության հարցում Իրանն առավելագույն զգայուն սուբյեկտ է, մի շարք հայտնի հանգամանքներով պայմանավորված, ու այդ հարցում Թեհրանը Երևանի համար դառնում է կարևորագույն գործընկեր՝ անմիջական սահմանակից հարևանությամբ: Ընդ որում, այստեղ խնդիրը նաև այն է, որ Իրանը Հայաստանի համար տարանցիկ երկու բաց ուղղություններից մեկն է, որը կարևորագույն նշանակություն ունի Հայաստանի ռազմա-տեխնիկական ներուժի, դրա վերականգնման համար: Իսկ անվտանգության խնդիրների օպերատիվ առաջնահերթությունը անշուշտ կենսական հրատապություն է դարձնում Հայաստանի ռազմա-տեխնիկական կարողությունների ընդլայնումը, որպես Ադրբեջանի մոտ որևէ արկածախնդիր գայթակղություն զսպելու կարևոր բաղադրիչ:

Միևնույն ժամանակ իհարկե պետք չէ նաև ուշադրությունից դուրս թողնել հանգամանքը, որ Իրանը ինչպես զգայուն է ռեգիոնալ կայունության սպառնալիքների նկատմամբ, նույնքան թերևս զգայուն է ռեգիոնում արևմտյան դիվանագիտական աշխուժության առնչությամբ, որ մասնավորապես ծավալվում է հայ-ադրբեջանական կարգավորման գործընթացի շրջանակում: Հայ-իրանական շփումն այստեղ կարևոր է դառնում նաև Իրանի մոտ հավելյալ տագնապներ չառաջացնելու տեսանկյունից, որոնք կարող են իրենց հերթին ազդեցություն թողնել անվտանգության հարցերում հայ-իրանական երկխոսության որակի վրա:

 

Աղբյուր՝ 1in.am