Ես կարծում եմ, որ մենք ունենք բավականին լավ կառույց: Այս մասին այսօր ԱԺ Մարդու իրավունքների պաշտպանության եւ հանրային հարցերի մշտական հանձնաժողովի արտահերթ նիստին ասաց  «Քաղաքացիական պայմանագիր» խմբակցության քարտուղար Արթուր Հովհաննիսյանը՝  անդրադառնալով իշխանության կողմից  առաջադրված՝ Մարդու իրավունքների պաշտպանի  պաշտոնին Անահիտ Մանասյանի թեկնածությանը:

Նա նկատեց, որ ընդդիմության՝ Մարդու իրավունքների պաշտպանի թեկնածու Էդգար Ղազարյանը հեղափոխությունը անվանել է ադրբեջանաթուրքական գործընթաց,  և նոյեմբերի իննից հետո ևս նման հայտարարություններ են եղել: Դիմելով հանձնաժողովի նախագահ Թագուհի Թովմասյանին՝ Արթուր Հովհաննիսյանն ասաց, որ քանի որ վերջինս չի զսպել թեկնածուին, հետևաբար կիսում է այդ հայտարարության քաղաքական պատասխանատվությունը:

«Այս երևույթը առհասարակ խոսում է այն մասին, որ ինչպես միշտ, այդպես էլ հիմա, ևս մեկ անգամ ապացուցվեց, որ Սերժ Սարգսյանի և Ռոբերտ Քոչարյանի թիմերը, որոնք ներկայացված են Ազգային ժողովում, այդ թվում նաև դուք, չեք սիրում այս երկիրը և այս ժողովրդին»,- ասաց նա:

Թագուհի Թովմասյանը նշեց, որ իր զգացմունքների մասին ինքը կխոսի, իսկ Արթուր Հովհաննիսյանն ասաց, որ փաստն է հնչեցնում:

 

Աղբյուր՝ araratnews.am