Կարո՞ղ է Հայաստանը օգուտ քաղել Ադրբեջան-ԱՄՆ-Ֆրանսիա հակասությունից
Radar Armenia-ն փորձել է հասկանալ՝ ի՞նչ հնարավոր օգուտներ կարող է ակնկալել հայկական կողմը Ադրբեջան-ԱՄՆ-Ֆրանսիա հակասությունից։
«Ինքնիշխան Հայաստան» կուսակցության ղեկավար Դավիթ Սանասարյանը Radar Armenia-ի հետ զրույցում ասաց՝ այս համատեքստում նախ պետք է արձանագրել, որ ԵԱՀԿ ՄԽ Հայաստանի «դաշնակից» Ռուսաստանը մնում է Ադրբեջանի հետ իր դաշնակցային հարաբերությունների շրջանակներում և մասնակցում Ադրբեջանի համար կարևոր միջոցառումներին։
Սանասարյանը Հայաստանի համար պոտենցիալ դաշնակիցներ է համարում Միացյալ Նահանգներին ու Ֆրանսիային և նշում, որ Շուշի չգնալով նրանք ևս մեկ անգամ ուղերձ են հղում, որ իրենք, մեղմ ասած, համաձայն չեն ռուս-ադրբեջանա-թուրքական եռանկյունու կողմից ձևավորած ստատուս քվոյի հետ. «Հայաստանն օր առաջ պետք է ճիշտ եզրահանգումներ անի՝ վերջին շրջանի իրադարձությունները վերլուծելով, և ավելի խիզախ քայլերով դուրս գա այս ծուղակից»:
Քաղաքագետ Տիգրան Գրիգորյանի կարծիքով՝ Ֆիլիպ Ռիկերին ԵԱՀԿ ՄԽ համանախագահ նշանակելով Վաշինգտոնը շատ լուրջ հարված է հասցրել ադրբեջանական հետպատերազմյան նարատիվին, թե հակամարտությունն ավարտված է, և Լեռնային Ղարաբաղի խնդրի շուրջ որևէ հարց քննարկելու իմաստ չկա։ «Ֆիլիպ Ռիկերը լուրջ փորձ ունեցող ազդեցիկ դիվանագետ է, և վերջին 15 տարիների ընթացքում ամերիկյան ամենաբարձրաստիճան դիվանագետն է, որ նշանակվել է այդ պաշտոնում»,- ասաց Գրիգորյանը։ Քաղաքագետի խոսքով՝ հայկական կողմը պետք է օգտագործի այս նշանակումը, ինչպես նաև Բաքվի և համանախագահող երկու երկրների՝ ԱՄՆ-ի ու Ֆրանսիայի, միջև հրապարակային բանավեճը՝ հայկական օրակարգերն առաջ տանելու համար։ Ըստ նրա՝ այլ հարց է, թե Երևանն արդյո՞ք նպատակ ունի շարժվել այդ ուղղությամբ։
Գրիգորյանը նկատեց, որ վերջին շրջանում պաշտոնական Երևանի դիրքորոշումները զգուշավոր են, և տպավորություն է, որ ամեն ինչ արվում է՝ Ադրբեջանին չգրգռելու համար։ Ըստ նրա՝ Ռուսաստանը ևս շահագրգռված չէ Մինսկի խմբի ձևաչափի գոյությամբ։ Նա վկայակոչեց ՌԴ ԱԳ նախարար Սերգեյ Լավրովի՝ Բաքվում արած հայտարարությունը։
Գրիգորյանի խոսքով՝ Բաքվի և Մոսկվայի դիրքորոշումները նույնական են. «Հայաստանը, ճիշտ աշխատանքի դեպքում, կարող է նաև այս հանգամանքը Արևմուտքում «վաճառել», քանի որ Ադրբեջանի և Ռուսաստանի միջև սերտագույն համագործակցություն է ընթանում այս փուլում։ Եվ պետք է հաշվի առնել, որ Ադրբեջանը կարծես շարժվում է ԵԱՏՄ-ի հետ ինչ-որ պայմանագիր կնքելու կամ անդամակցելու ուղղությամբ, ապա դիվանագիտական դաշտում կարելի է փորձել այս ամենի արդյունքում միավորներ շահել»։
Ի հավելումն հիշեցնենք, որ օգոստոսի 31-ին Բրյուսելում տեղի կունենա Փաշինյան-Ալիև հանդիպումը։
Հայկ Մագոյան