Մեծ ուշադրություն ենք դարձնելու արտահանումով զբաղվող փոքր ու միջին ձեռնարկությունների զարգացմանը. Վահան Քերոբյան
Նախագիծը ներկայացնող էկոնոմիկայի նախարար Վահան Քերոբյանը հիշեցրեց, որ այս նախագիծը Volterman-ի նախագիծ են անվանում և դա կապված է Volterman դրամապանակների հետ, քանի որ այս փոփոխությունը նրանց կողմից է առաջարկվել:
«Քաղաքացիական պայմանագիր» խմբակցությունից Սիսակ Գաբրիելյանը նկատեց, որ քանի որ մենք արտահանմանն ուղղված քաղաքականություն ենք վարելու, ինչո՞ւ է հենց մեկ միլիոնի և ոչ ավելի գումարի համար նախատեսված այս արտոնությունը, իսկ Վահան Քերոբյանն ասաց որ դա ընդունված է բոլոր տեղերում, քանի որ մի միլիոնից ավելին ՓՄՁ չեն համարում:
«Կառավարությունը, էկոնոմիկայի նախարարությունը մեծ ուշադրություն է դարձնում և դարձնելու փոքր ու միջին ձեռնարկությունների զարգացմանը և մեր ուշադրությունը սևեռվելու է այն ընկերություններին, որոնք ունեն աճի մեծ պոտենցիալ և դրանք այն ընկերություններն են, որոնք արտահանումով են զբաղվում»,- ասաց նա:
Իր ելույթում «Քաղաքացիական պայմանագիր» խմբակցության անդամ Բաբկեն Թունյանը ընդդիմադիր գործիչներին կոչ արեց առաջարկներ ներկայացնել առաջինից երկրորդ ընթերցման ընթացքում: «Հանձնաժողովի առաջին նիստին պարոն Քերոբյանի հիմնական ընդդիմախոսը ՔՊ պատգամավորներն են, եկեք դուք էլ մասնակցեք»,- ասաց նա:
Հիշեցնենք, որ «Պետական տուրքի մասին» օրենքում փոփոխություն կատարելու մասին» Հայաստանի Հանրապետության օրենքի նախագիծը կառավարության նիստին ներկայացնելիս՝ Վահան Քերոբյանը նշել էր, որ սա պետւթյան վրա նստելու է ընդամենը տարեկան 100 միլիոն դրամ, բայց կարծում են, որ իր տնտեսական էֆեկտը շատ մեծ է լինելու: Նիկոլ Փաշինյանը այդ հարցի քննարկմանը ասել էր, որ եթե ուզում են արտահանում խրախուսել, ինչո՞ւ են նման տուրքեր սահմանում։ «Մենք մի կողմից գրել ենք արտահանմանը միտված տնտեսություն ենք ուզում, հետո ենթադրենք արտաhանման վրա տուրքեր ենք բերել: Մենք ասում ենք պետք է հինգ տարի անընդմեջ 7 տոկոս տնտեսական աճ ունենանք, բա ո՞նց աճ ունենանք, եթե մարդկանց չենք թողնում արտադրեն, արտահանեն»,– ասել էր նա:
Իսկ ՊԵԿ նախագահ Վարդան Բադասյանն ավելի ճիշտ էր համարում թիրախային խրախուսել, քան նման փոփոխությամբ, քանի որ տարբեր չարաշահումների առիթ կարող է ստեղծել այս որոշումը, օրինակ՝ տասը միլիոնի արտահանում անողը կտրոհի և տասը՝ մեկ միլիոնի կանի։ Այս մտահոգությունը հնչեց նաև Ազգային ժողովում, և նախարարն ասաց, որ այդ տրոհելն էլ հավելյալ ծախսեր է բերելու: