Կոռնիձոր է այցելել ԵԱՀԿ գործող նախագահի անձնական ներկայացուցիչ Անջեյ Կասպշիկը: Նա, ըստ տարածված տեղեկության, պետք է ծանոթանա իրավիճակին, որ դրա վերաբերյալ զեկուցի ԵԱՀԿ գործող նախագահին, որը ներկայումս Հյուսիսային Մակեդոնիայի արտգործնախարարն է՝ ԵԱՀԿ-ում նախագահում է այդ երկիրը: Կոռնիձորը կարծես թե վերածվել է դիվանագիտական տուրիզմի կենտրոնի, ուր այցելում են արտերկրի ամենատարբեր դիվանագետներ, դեսպաններ, դեսպանատների աշխատակիցներ, միջազգային կազմակերպությունների ներկայացուցիչներ, «ծանոթանում» են իրավիճակին, երբեմն լուսանկարվում, տեսանկարահանվում, մտահոգություն արտահայտում, եւ վերադառնում:

 

Ո՞րն է այդ ամենի արդյունքը, պարզ չէ, կամ ավելի շուտ՝ այդ ամենն արդյունք չունի, համենայն դեպս, քանի դեռ Արցախը պաշարված է, քանի դեռ մարդասիրական շարասյունը կանգնած է Կոռնիձորում, արդեն գրեթե մեկ ամիս, քանի դեռ Ադրբեջանը անարգել շարունակում է սովահարության շանտաժի ենթարկել 120 հազար մարդու, այդ թվում մոտ 30 հազար երեխայի, նաեւ հղի կանանց, տարեցների, առողջական խնդիր ունեցողների: Այդ պայմաններում, դեպի Կոռնիձոր դիվանագիտական տուրիզմի այս «զարգացումը» կամա, թե ակամա վերածվում է ծաղրի: Հարց է առաջանում, այս ընթացքում տասնյակ դիվանագետներով պարբերաբար այցելելով Կոռնիձոր, ինչի՞ն են այդքան ծանոթանում, ծանոթանում են, որ ի՞նչ անեն, ո՞րն է այդ ծանոթությունների արդյունքը, նպատակը: Եթե դա ինչ որ բան փոխելն է, ապա ու՞ր են գործողությունները: Չկան անգամ գործողությունների մտադրություն պարունակող հստակ հայտարարություններ: Մտահոգությունները, որ հնչում են, կոչերը, որ հնչում են՝ Բաքվին ուղղված, դրանք գործողությունների մտադրության մասին չեն:

 

Ավելին, եթե լինի գործողությունների մտադրություն, ապա այլեւս չէին լինի մտահոգության մասին կոչեր, այլ կլիներ բոլորովին այլ բովանդակության ու տրամաբանության հռետորաբանություն, ինչի հանդեպ Ադրբեջանը հազիվ թե մնար անտարբեր: Անջեյ Կասպրշիկը և նրա խումբը Կոռնիձոր չէ, որ պետք է այցելեն, այլ պետք է նախ և առաջ թերևս համալիր կերպով հանրայնացնեն իրենց տասնամյակների աշխատանքը, երբ այսպես ասած ԵԱՀԿ մոնիտորինգ են իրականացրել արցախ-ադրբեջանական շփման գծում: Կասպշիկը թերեւս պետք է ինքը հանրություններին ծանոթացնի այդ մոնիտորինգի արդյունքների հետ, ներկայացնի, թե արձանագրե՞լ են արդյոք Ադրբեջանի ագրեսիվության աճ, արձանագրե՞ են արդյոք, որ Ադրբեջանն ի հեճուկս միջազգային նորմերի եւ ձեւաչափերի, խախտում է արցախյան հարցի խաղաղ կարգավորման հանձնառությունները եւ իրականացրել ռազմմական ագրեսի: Մինչեւ Կոռնիձոր այցելելը, կամ Կոռնիձոր այցելելու փոխարեն, Անջեյ Կասպշիկը ունի թերեւս իր ու խմբի նախկին գործունեության եւ դրա արդյունավետության վերաբերյալ հանրային լայն հաշվետվություն ներկայացնելու անհրաժեշտություն: Այլապես, ինչպես աշխատանքի իմիտացիայի տպավորություն է եղել նախորդ շրջանում, այդպես էլ այսօր ստեղծվում է այդ տպավորությունը: Միաժամանակ, իհարկե, այդ ամենով ստեղծվում է հայկական դիվանագիտության աշխատանքի իմիտացիայի տպավորություն, քանի որ առայժմ արդյունքների բացակայության համար պատասխանատվությունը լոկ միջազգային կառույցներինը չէ, այլ Հայաստանի դիվանագիտությանը:

 

Աղբյուր՝ 1in.am