«Այս գործողություններից առաջ արդեն ակցիաներ եղել էին, որի ժամանակ մասնակիցները մեր երկրում գտնվող դեսպանատներին նամակներ էին փոխանցել, այսինքն՝ կար համապատասխան կոչ: Այսօր ինչ-որ չհաջողված փորձեր էր, որոնք մտածելու տեղիք են տալիս։ Այս հավաքները ինքնաբուխ չեն կարող լինել, հստակ կորդինացվում են Մոսկվայի մոտեցումների և քայլերի հետ։ Սա Ռուսաստանից Հայաստանի դեմ տարվող հիբրիդային պատերազմներից մեկն է, այնպես, ինչպես Լաչինի միջանցքը արգելափակվեց ռուս-ադրբեջանական ջանքերի շնորհիվ։ Հիմա ճանապարհն ինչո՞ւ են փակում, որ մարդկանց տեղեկացնե՞ն, բայց մարդիկ թքելու են երեսներին, որովհետև այստեղ բոլորն էլ իրազեկված են, թե ինչ է կատարվում Արցախում»,- «Հայկական ժամանակ»-ի հետ զրույցում ասում է նա։

Քաղաքագետի կարծիքով՝ այդ հիբրիդային պատերազմը կառավարողներից մեկը Ռուբեն Վարդանյանն է. «Առանձին ջոկատների հրամանատարներից մեկն է, այժմ չինացի խաղաղապահներ է ուզում, մինչ այդ թաթարական էր ուզում, վաղը չգիտես՝ ինչ կուզի»:

Մեհրաբյանը նկատել է, որ ակցիայի մասնակիցները հանդիմանել են անցորդներին, հասարակական տրանսպորտում և անձնական մեքենաներում գտնվող քաղաքացիներին, որոնք չեն միացել ակցիային:

«Մարդիկ ասում են՝ գնացեք, ձեր խելքին տիրություն արեք։ Տեսել ենք արդեն, որ ընդդիմության փողոցային ակտիվությունը ոչինչ չարեց, բացի խայտառակելուց»,- ասում է նա՝ հավելելով, որ Հայաստանի ընդդիմությունն էլ տեսադաշտում չէ, քանի որ նրանց ասվել է. «Չխառնվեն, որ այս պահին եղած ակցիաների մեջ իմաստ լինի, հակառակ դեպքում հնամաշ դեմքերը կփչացնեն այն։ Այսօր ինչ տեղի է ունենում, դրա ճարտարապետը ՌԴ-ն է։ ՀՀ-ն ապակայունացնելու հրամանն էլ գալիս է ռուսական շտաբից»։

Զրուցակիցը կարծում է, որ ապակայունացման միջոցով ՌԴ-ն ցանկանում է ճնշումների ենթարկել Հայաստանին, պահանջել վերահսկողություն ՀՀ կոմունիկացիաների նկատմամբ, ապահովել ներկայություն հայ-ադրբեջանական սահմանին և Արևմուտքի հետ հարաբերությունները հասցնել զրոյական մակարդակի:

«Այդպիսով մեզ վերածելով երկրորդ Բելառուսի։ Դրա համար մի շարք բութ գործիքներ է օգտագործում՝ Ալիևի ռեժիմ, Արցախի ղեկավարություն, ՀՀ-ում «5-րդ շարասյուն» և «6-րդ պալատ», ինֆորմացիոն դիվերսիա, Մաշա Զախարովայի հաթաթաներ։ Արցախի ղեկավարության որոշ անպատասխանատուներ էլ, որոնք զբաղեցնում են պատասխանատու պաշտոններ, մտածում են՝ իրենց ուզածով պետք է ամեն ինչ լինի, բայց իրենց ուզածը ԱԺ հոգեբուժական կազմի տարբեր հայտարարություններով հնչեցվող աբսուրդն է։ Դա այն է, ինչ ՌԴ-ն է ուզում. Ռուսաստանի համար մեծ հաճույք կլինի մեր երկիրը տեսնել ապակայունացած»,- համոզմունք է հայտնում նա:

Մեհրաբյանը նաև կարծում է, որ մեր երկրում տեղակայված դիվանագիտական կառույցները, անշուշտ, նկատում են այս գործողությունները, սակայն անհաղորդ են, քանի որ քաջ գիտակցում են՝ այս ամենի հետևում Ռուսաստանն է կանգնած: «Կարդում են ՌԴ-ի բոլոր հայտարարությունները, տեսնում՝ փողոցում ինչ է կատարվում ու հասկանում են ամեն բան»,- ասում է նա:

Աղբյուր՝ armtimes.com