«Այս առաքելությանը սկիզբ դրվեց Պրահայի գագաթնաժողովից հետո, երբ Ֆրանսիան, Եվրամիությունը Հայաստանի և Ադրբեջանի առջև հանձն առան ԵՄ առաքելություն տեղակայել: Առաքելությունը հնարավորինս արագ՝ մի քանի օրից, մի քանի շաբաթից կհասնի 100 հոգու, այս պահին այստեղ են 50 դիտորդներ։ Սա քաղաքացիական առաքելություն է, ինչը նշանակում է, որ դիտորդները զինված չեն, նրանց նպատակը պարեկություն կատարելն է, համոզվելը, հաստատելը, որ չլինեն ներխուժումներ Հայաստանի տարածք, փոխհրաձգություն, բռնությունների վերսկսում Հայաստանի և Ադրբեջանի միջև ամբողջ սահմանի երկայնքով։ Այս պարտավորությունը, իմ կարծիքով, շատ կարևոր է, շատ գնահատելի է Եվրամիության կողմից, որի հիմնական նպատակն է վստահություն ներշնչել տեղի բնակչությանը», - ասաց Եվրախորհրդարանի պատգամավորը։

Եվրոպական խորհրդարանի ֆրանսիացի պատգամավոր Նատալի Լուազոն հիշեցրեց, որ խորհրդարանի արտաքին գործերի հանձնաժողովը զեկույցով պահանջել է Ադրբեջանից դուրս բերել զինված ուժերը Հայաստանի ինքնիշխան տարածքից ու վերադառնալ նախկին դիրքեր։

«Հաճախ ենք լսել, որ Ադրբեջանը պահանջում էր հարգել իր տարածքային ամբողջականությունը, Հայաստանը ևս տարածքային ամբողջականությունը պաշտպանելու իրավունք ունի, և սա քննարկման ենթակա չէ», - հավելեց նա։

Եվրոպական խորհրդարանի պատգամավորի կարծիքով՝ սահմանների մշտադիտարկման համար խոչընդոտ չէ, որ չկա Հայաստանի ու Ադրբեջանի միջև վերջնական դելիմիտացիա. «Մենք բոլորս գիտենք, որ կողմերի միջև վերջնական ու ճշգրիտ սահմանազատում չկա, ու դա խաղաղության հաստատման պայմաններից մեկն է»:

«Ցանկալի է, որ այդ հանձնաժողովի աշխատանքը առաջընթաց ունենա, դրանով հանդերձ ոչ ոք չի կարող ժխտել, որ սեպտեմբերին կատարվածը ներխուժում էր և հարվածներ էին Հայաստանի ինքնիշխան տարածքի նկատմամբ։ Գյուղերը, որոնք թիրախավորվել են, հայաբնակ, Հայաստան պետության կողմից կառավարվող բնակավայրեր են, հետևաբար Հայաստանն է, որ թիրախավորվել է», - նկատեց պատգամավորը:

Նատալի Լուազոն Հայաստան է եկել Հավրի քաղաքապետ, Ֆրանսիայի նախկին վարչապետ Էդուարդ Ֆիլիպի պատվիրակության կազմում։ Ֆրանսիական պատվիրակությունը Հայաստան է ժամանել՝ «ի նշան հայ ժողովրդի հետ բարեկամության և համերաշխության», այցելել են Գորիս, հանդիպել նաև Լաչինի միջանցքի շրջափակման հետևանքով տուժած բնակչությանը, նրանց ընդունել է վարչապետ Փաշինյանը։

Ֆրանսիայի նախկին վարչապետ Էդուարդ Ֆիլիպի խոսքով՝ եվրոպացի դիտորդների ժամանումը լավ լուր է Հայաստանի համար, քանի որ, նրա կարծիքով, դիտորդները կկարողանան հետևել, որ չլինեն ներխուժումներ Հայաստանի ինքնիշխան տարածք, կամ ծայրահեղ դեպքում կկարողանան արձանագրել իրադարձությունները։ Ֆրանսիացի պաշտոնյան ուրախությամբ նկատեց, որ «ԵՄ-ը կարողացավ արագ կազմակերպվել ու ուղարկել նման առաքելություն Հայաստան»։

«Սա լավ լուր է նաև Եվրոպայի համար, որովհետև վաղուց ԵՄ-ն այսքան արագ չէր գործել ի շահ Հայաստանի», - ասաց Հայաստան ժամանած Ֆրանսիայի նախկին վարչապետը։