Հիշեցնենք՝ երեկ Ֆրանսիայի Հանրապետության Ազգային ժողովը միաձայն ընդունել է Հայաստանին աջակցող և Ադրբեջանի նկատմամբ պատժամիջոցներ առաջարկող բանաձև։

«Պետք է հաշվի առնել, թե բանաձևը որքանով ազդեցության լծակներ կունենա Թուրքիայի և Ադրբեջանի վրա, որպեսզի պաշտպանի Հայաստանի անվտանգային շահերը: Սա կասկածի տեղիք է տալիս, որովհետև այդ երկու երկրները վերահսկողությունից և ազդեցությունից դուրս, ինքնուրույն արտաքին քաղաքականություն վարող քաղաքական ուժեր, պետություններ են, որն էլ նրանք բացարձակապես չեն թաքցնում, անգամ հայտարարում, որ նմանօրինակ որևէ բանաձև կամ հայտարարություն իրենց համար ոչ մի արժեք չունի և չի կարող ազդեցություն ունենալ»,- «Հայկական ժամանակ»-ի հետ զրույցում ասում է Քեռյանը:Նրա համոզմամբ՝ Ֆրանսիայի ընդունած որոշումներն էական ազդեցություն չեն ունենա և չեն ապահովի Հայաստանի անվտանգային միջավայրը: Անգամ ԱՄՆ-ի քայլերն այսօր չեն զսպում Էրդողանին անել այն, ինչ ուզում է: Ցանկացած արևմտյան երկրի որոշում մինչ օրս չի փոխել առկա իրավիճակը կամ նպաստել ՀՀ անվտանգային միջավայրի բարելավմանը:

«Ադրբեջանի ներկայիս ստրատեգիան ղարաբաղյան 3-րդ պատերազմ սանձազերծելն է, որի համար ամեն բան անում է: Այդ նպատակով նրանք հիմա ամենաբարենպաստ վիճակում են, որովհետև Արևմուտքից Հայաստանին ցուցաբերվում է բարոյական մեծ աջակցություն, իսկ մենք մեկուսացված ենք մեր մի շարք գործընկերային ձևաչափերում: Ողջունելի է նաև, որ զինատեսակներ են ներմուծվում Հնդկաստանից Հայաստան, սակայն համոզված չեմ, որ դրանք հասել են տեղ և, եթե հասել են, որքանո՞վ կարող են նպաստել մեր անվտանգության կարգավորմանը: Մենք պետք է կարողանանք ամեն գնով կանխել Ադրբեջանի կանխամտածված ստրատեգիան, որովհետև ներկայիս ուժերի հարաբերակցության պարագայում 3-րդ ղարաբաղյան պատերազմը կործանարար կլինի Հայաստանի համար»,- կարծում է նա:Ըստ Քեռյանի՝ Ռուսաստանին Ֆրանսիայի ընդունած բանաձևն առանձնապես չի էլ հետաքրքրում՝ հաշվի առնելով ռուս-ուկրաինական պատերազմն ու նրա առաջ ծառացած բազում գլոբալ խնդիրներն ու պատժամիջոցները:

«Ռուսները հիմա ծանր ու թեթև են անում, թե իրենց շահերի տեսանկյունից որն է ավելի նպատակահարմար՝ թույլ տա՞լ ռազմական էսկալացիա Հայաստանի և Ադրբեջանի միջև, թե՞ ոչ: Կարծում եմ՝ դրա թույլ տալը չի բխում ՌԴ-ի շահերից, որովհետև Կրեմլում գիտակցում են, որ Թուրքիայի հետ համագործակցության ձևաչափը իրադրային է՝ միաժամանակ ունենալով մրցակցային բաղադրիչներ»,- ասում է նա:

Զրուցակցի համոզմամբ՝ նոր պատերազմը ռուսական կողմին ձեռնտու չէ. «Նրանք քաջ գիտակցում են, որ եթե Կովկասում պատերազմ լինի, չեն կարող չմասնակցել և զերծ մնալ, իսկ դա արդեն կթուլացնի Ռուսաստանին ուկրաինական ճակատում: Համեմատության արդյունքում պարզ է դառնում, որ այս իրավիճակում Հայաստանի և Ռուսաստանի շահերը համընկնում են. թե՛ ռուսներին, թե՛ հայերին ձեռնտու չէ նոր պատերազմի ծավալումը»:

Վերջինս նշում է՝ այս մասով շատ աշխատանքներ պետք է իրականացնենք՝ առանց հաշվի առնելու, թե նախկինում ինչ է եղել: Պետք է գործել առանց հուզականության, սառն ու մերկ հաշվարկներ կատարել՝ ունենալով միայն մեկ գերնպատակ, բոլոր միջոցներով կանխել պատերազմն ու հենվել Ռուսաստանի և Հայաստանի շահերի համատեղման վրա: «Սա է ելքը­»,- շեշտում է Գարիկ Քեռյանը: