Նոել Քեշիշյան

Հայտնի անհայտ եմ

Միթե՞ սա ես եմ:

Երբ Աստված ժպտում է բառեր են քայլում,

Քո՝ նման նրա՝ նման, ո՝վ ի՛ր նման

Բոլոր մարդուկների նման,

Բայց ոչ իմ նման:

Ես հայտնի անհայտ եմ մեր քաղաքում,

Կարծես մատներիս արանքում կորած լինեմ,

Նույնիսկ հայելին ինձ չի ճանաչում:

Իմ եսի հետքերը շատ են տարածքում,

Երբ ամբոխի արանքում եմ տեղից տեղ շարժվում

Միայն մարդաճանաչն է ինձ նկատում:

Անճանաչելիության ծովի կաթիլս եմ փրկում,

Գոլորշեղեն բառ եմ դառնում, ու ամպից կախվում

Մի այլ տեղ վայր եմ թափվում

Ու համբուրում եմ սիրահարներիս,

Կաթիլ կաթիլ բառերով:

***************

Քամին ասաց

Դալար ճյուղերը ծառի'

Թևթևի տված ու անհոգ

Քամու համբույրներից շվատ

Պար էին բռնել շվիահար աշուղ Քամուց։

Քամին ասաց

- բնավորվե՝ք կանաչ կյանքով, ձեր հողում

Հսկաներ դարձեք ձեր արմատագիրկ դաշտերում,

- ես թույլերին գարնան տաղով եմ պարի կանչում,

Բայց երբեմն էլ հսկաների արմատներն եմ փորձում,

Իմ գալ ու գնալը իզուր չէ,

Կյանքի դասեր եմ ուսուցում։

*****************

Խաղաղություն եմ կանչում

Կլսի՞ կգա՞ արդյոք....

..................

Մայրամուտը՝ ամեն օր գալիս

Ու մտահորիզոնս գրկում է,

Մթությունը ինձ հասկանում է,

Երբ երազիս անվանդակ թռչնին եմ կանչում,

.... գիշրաթև խաղաղությանը:

********************

Կանգառ

Մտածելուց

Հոգնել է միտքս... դանդաղե՝լ

Կանգառ է փնտրում:

Բայց դու մի վախեցիր,

Քո սիրո մասին

Սիրտս չի մտածում

Դեռ մի բան էլ արագանում ...

******************

Արևածաղիկ

Լուսաբացին երևակայեցի

դու իմ գարնան արևն ես,

Ակամայից

Սիրտս դարձավ արևածաղիկ,

Շրջվեցի....

*********************

Տեսապատկեր

Ուզում եմ ժպտալ կյանքիս ուրախ օրերին,

Բայց վախենում եմ հայելին չհանդուրժի

Ու փշրվի սրտանց:

Գրեցի այս տողերը բայց չկարողացա ստուգել

Ճիշտ եմ թե՞ սխալ:

Ակնոցս բաճկոնիս գրպանն է

Նա մերժում է ինձ տալ որ չվերադառնամ անցյալ:

Մի հարց ունեմ տեսնեմ ո՞վ կիմանա,

Ինչու՞ են այսքա՜ն թևակոտոր թռչուններ թափվում

Ոտքերիս տակ ամեն առավոտ

................

Հավատք եմ բերել ագռավների ասածներին որ ասում են.

Մի օտարական փախցրել է ծառերի աչքերից

Այն տեսապատկերը՝

Որ կյանք էր բաբախում մեջը՝

Ու մաքրասիրտ նորածինների գրված նամակները

Արագիլներին:

Նոր-Ջուղա, Սպահան