ԱՄՆ-ն հասկանում է Հայաստանի վիճակը և չեմ կարծում, թե հայերը կարող են կողմ լինել պատերազմին՝ անկախ նրանից, թե դա ում դեմ է
«Առաջին լրատվական»-ի զրուցակիցն է Ամերիկայի հայկական համագումարի տարածաշրջանային գրասենյակի տնօրեն Արփի Վարդանյանը։
-Տիկին Վարդանյան, ՀՀ վարչապետի և ՌԴ նախագահի հանդիպման արդյունքում ընդունվեց 30 կետից բաղկացած համատեղ հայտարարություն, որտեղ մի քանի կետերում ակնհայտ էր Հայաստանի աջակցությունը Ռուսաստանի գործողություններին Ուկրաինայում։ Ձեր կարծիքով ԱՄՆ-ն ինչպե՞ս կվերաբերի Երևանի այդ մոտեցմանը։
–Բարդ հարց է, քանի որ իրավիճակն օրեցօր փոխվում է։ Ուզում եմ պարզապես ասել, որ Միացյալ Նահանգները հասկանում է Հայաստանի դիրքորոշումն ու վիճակը։ Հայաստանը գտնվում է այսպես ասած «երկու քարի արանքում»։Մի կողմից Ռուսաստանը, որը մեծ դեր ունի տարածաշրջանում, մյուս կողմից էլ ակնհայտ է, որ Հայաստանն ուզում է արևմուտքի տարբեր երկրների հետ հարաբերությունները լավացնել։ Ես նաև չեմ կարծում, որ Հայաստանն ու հայերը կարող են կողմ լինել պատերազմին, չեն կարող որևէ ազգի դեմ իրականացվող այս ոճրագործություններին կողմ լինել։
Մենք հիշում ենք ապրիլի 24-ը, մեր անմեղ զոհերին, արցախյան պատերազմում զոհվածներին։ Բոլորն իրենց աչքերով տեսան, թե ինչ է կատարվում։ Ադրբեջանն ու Թուրքիան շարունակում են հայերի նկատմամբ ցեղասպանական քայլերը։ Մեր ժողովուրդը չի կարող կողմ լինել պատերազմներին՝ անկախ նրանից, թե որ ազգի դեմ է դա իրականացվում։ Պատերազմը վատ բան է, մարդու իրավունքների կոպտագույն խախտում։ Ես չեմ կարող հասկանալ՝ ինչպես կարող է որևէ հայ դա ընդունել ու կողմ լինել։
-Հայաստանում ԱՄՆ դեսպան Լին Թրեյսին ապրիլի 20-ին այցելել է Ամուլսարի ոսկու հանքավայր, որտեղ առ այսօր սառեցված է Լիդիան ընկերության ներդրումային ծրագիրը: Այս փուլում նման այցն ինչո՞վ կպայմանավորեք։
–Դեսպան Թրեյսին գնում է խնդիրներն իր աչքերով տեսնելու համար։ Ըստ իր տեսածի կարող է արժեքավոր տեղեկություններ փոխանցել։ Ըստ իր տեղեկությունների էլ՝ ԱՄՆ-ն կարող է որոշ քայլեր ձեռնարկել կամ չձեռնարկել։ Ամեն ինչ հնարավոր է։ Կարևոր է, որ նա ոչ միայն դեսպանատան շենքում է նստում, այլ գնում մարդկանց հետ խոսում, լրագրողների հարցերին պատասխանում, այլ մարդկանց հետ խոսում ու հասկանում, թե ինչ վտանգներ կան կամ կարող են լինել։
-Կարծում եք՝ պատահակա՞ն է, որ այցը տեղի ունեցավ Փաշինյան-Պուտին հանդիպման հաջորդ օրը։ Գուցե Վաշինգտոնր սրանով մեսի՞ջ է փոխանցում։ Հնարավո՞ր է հանքի շահագործման առումով նորություններ լինեն։
-Չեմ կարծում, թե մեկը մյուսի հետ կապ ունի։ Դեսպան Թրեյսին վերջին ժամանակահատվածում սկսել է հաճախակի գնալ տարբեր տեղեր։ Չեմ կարող ասել, որ մեկը մյուսի հետևանք է, կարող է պարզապես համընկել է։
Հեղինակ՝ Մարիամ Գրիգորյան
1in.am
Նմանատիպ Լուրեր
