Երթուղիների ապաշրջափակման մասին հայտարարությունը, ակնհայտորեն ռուս-թուրք-ադրբեջանական օրակարգ է
Սոչիում կայացած Պուտին-Ալիև-Փաշինյան եռակողմ հանդիպման արդյունքում ստորագրված փաստաթղթում որևէ խոսք չկա Արցախի հիմնահարցի կարգավորման և հակամարտող կողմերի միջև խաղաղություն հաստատելու մասին, ինչն ակնհայտորեն Ադրբեջանի պարտադրանքն է։
Եթե ուշադրություն դարձնենք, կնկատենք, որ իր ելույթների ընթացքում Ադրբեջանի նախագահը գեթ մեկ անգամ չի արտաբերել «Լեռնային Ղարաբաղ» արտահայտությունը՝ ցույց տալով, որ այդպիսի սուբյեկտ այլևս գոյություն չունի։ Այս հայտարարությունը անուղղակի կերպով դա հաստատել է։
Երկու կողմերը պայմանավորվել են երկու պետությունների միջև սահմանազատում իրականացնել, որը նախորդ կետի շարունակությունն է: Ակնհայտ է, որ առանց Արցախի կարգավիճակի հաստատման՝ սահմանազատումը բերելու է Ադրբեջանի կողմից Արցախի կլանման և հայաթափման։
Ադրբեջանն իր վրա ոչ մի պարտավորություն չի վերցրել ո՛չ գերիների հանձնման, ո՛չ Հայաստանի ինքնիշխան տարածքից զորքերի հեռացման, ո՛չ Արցախի որևէ տարածքի ապաբռնազավթման: Բացարձակապես ոչ մի պարտավորություն։
Կողմերը պայմանավորվել են միայն տրանսպորտային երթուղիների ապաշրջափակման մասին, որն ակնհայտորեն ռուս-թուրք-ադրբեջանական օրակարգ է, և առաջին հերթին ծառայում է նրանց տնտեսական շահերին։
Իսկ ի՞նչ է շահել Հայաստանը՝ այս հայտարարությունը ստորագրելով։ Գիտակից հայերը մի բան պիտի հասկանան, որ պետք է դիմադրենք և թույլ չտանք, որ մեր հայրենիքը պատառ առ պատառ, իսկ հիմա ավելի մեծ պատառներով հանձնեն թշնամուն։
Անահիտ Վարդանանց
Նմանատիպ Լուրեր
