Արաբական լրատվամիջոցները հոկտեմբերի 17-ի ուշ երեկոյան հայտնել են, որ իսրայելական օդուժի հրթիռը հարվածել է Գազայի հատվածում գտնվող հիվանդանոցին։ Վերջին տվյալներով՝ զոհերի ու վիրավորների թիվը գերազանցել է 800-ը։

 

Ներկայացնում ենք համառոտ՝ ինչ է հայտնի օդային հարձակման և դրա հետևանքների մասին:

 

Այսպես. Իսրայելի ռազմաօդային ուժերը մի շարք հարձակումներ են իրականացրել Գազա քաղաքի կենտրոնական շրջանների վրա։ Ինչպես հաղորդում է Al Hadath հեռուստաալիքը, դրանց ընթացքում հրթիռներ են դիպել Ալ-Մաամադանի հիվանդանոցին։

Ըստ բժշկական աղբյուրների՝ զոհերի թիվը գերազանցել է 300-ը։ Al Arabiya-ն հայտնում է, որ զոհերի և վիրավորների թիվը հասել է 800-ի։

 

Al Hadath հեռուստաընկերության զեկույցում ասվում է, որ շատ հիվանդներ դրսում հերթի մեջ են։ Հրթիռների պայթյունները վնաս են հասցրել հարևան շենքերին, որտեղ նույնպես զոհեր են եղել։

 

Միջադեպի կապակցությամբ Պաղեստինի ղեկավարությունը արտակարգ խորհրդակցություն է անցկացրել։

 

ՀԱՄԱՍ արմատական խմբավորումը հիվանդանոցի վրա հարձակումը համարում է ցեղասպանության հանցագործություն։ Շարժումը դիմել է միջազգային հանրությանը, արաբական և իսլամական երկրներին՝ պահանջելով «վերցնել պատասխանատվությունը և անհապաղ միջամտել» Իսրայելի իշխանությունների ագրեսիան դադարեցնելու համար։

 

Իսրայելի պաշտպանության բանակն իր հերթին  հայտարարել է, թե կապ չունի միջադեպի հետ և որ Գազայի հոսպիտալում տեղի ունեցած հզոր պայթյունը պաղեստինյան անկլավից անհաջող հրթիռի արձակման հետևանք է, և որ պատասխանատվությունը կրում է «Իսլամական ջիհադ» կազմակերպությունը:

 

Պաղեստինի նախագահ Մահմուդ Աբասը երկրում եռօրյա սուգ է հայտարարել։ Al Mayadeen հեռուստաալիքի փոխանցմամբ՝ նա հեռացել է Ամմանից՝ չսպասելով հոկտեմբերի 19-ին ԱՄՆ նախագահ Ջո Բայդենի հետ նախատեսված հանդիպմանը, շտապ վերադարձել է Ռամալլա։

 

Պաղեստինի առողջապահության նախարար Մեյ Քեյլը դիմել է ՄԱԿ-ին, միջազգային և մարդասիրական կազմակերպություններին և աշխարհի բոլոր երկրներին՝ կոչ անելով փրկել պաղեստինյան ժողովրդին ցեղասպանության քաղաքականությունից, որը Իսրայելի իշխանությունները վարում են նրա դեմ։

 

Իսրայելի վարչապետ Բենիամին Նեթանյահուն անձամբ հերքել է այն պնդումները, թե իսրայելցի զինվորականները մասնակցել են Գազայի հիվանդանոցի վրա հարձակմանը, որը հանգեցրել է մեծ թվով զոհերի։ Նրա խոսքով՝ այս պայթյունն ահաբեկիչների ձեռքի գործն է։

 

Արտերկրում ՀԱՄԱՍ շարժման ղեկավար Խալեդ Մեշալը մուսուլմաններին կոչ է արել բողոքի ցույցեր կազմակերպել ամբողջ աշխարհում Իսրայելի դեսպանատների առջև։

 

Գազայի հատվածի առողջապահության նախարարությունը հայտնել է, որ հիվանդանոցի հարձակման հետևանքով բոլոր զոհվածները խաղաղ բնակիչներ են:

 

Իսրայելի նախագահ Իսահակ Հերցոգը լրատվամիջոցներին մեղադրել է պաղեստինցիների հայտարարություններին անմիտ հետևելու մեջ։
Իսրայելի պաշտպանության բանակի մամուլի ծառայությունն էլ հայտարարել է, որ իր տրամադրության տակ եղած օպերատիվ տվյալների վերստուգումը հաստատել է «Իսլամական ջիհադի» մեղքի մասին վարկածը։ «Իսլամական ջիհադը» իր հերթին հերքել է Իսրայելի այն պնդումը, թե ինքը պատասխանատու է հարձակման համար:

 

Ռուսաստանը և ԱՄԷ-ն դիմել են ՄԱԿ-ի Անվտանգության խորհրդին՝ հոկտեմբերի 18-ին նիստի հրատապ խնդրանքով։ ՏԱՍՍ-ը հայտնում է, որ կազմակերպությունում Ռուսաստանի Դաշնության մշտական ներկայացուցչությունն այնուհետ հաստատել է, որ հանդիպումը տեղի կունենա այսօր:

 

ՀԱՄԱՍ-ի առաջնորդն ասել է, որ ԱՄՆ-ն պատասխանատու է Գազայի հատվածում Իսրայելի հանցագործությունների համար, Պենտագոնը Իսրայելին կոչ է արել հետևել պատերազմի կանոններին, Եգիպտոսը դատապարտել է հարձակումը և հայտարարել, որ այն համարում է մարդասիրական իրավունքի խախտում, Կանադայի վարչապետ Ջասթին Թրյուդոն սարսափելի և լիովին անընդունելի է համարում Իսրայելի ռազմաօդային ուժերի հարվածը հիվանդանոցին, Եվրոպական խորհրդի ղեկավար Շառլ Միշելը խոստովանել է, որ միջադեպը չի համապատասխանում մարդասիրական չափանիշներին, Թուրքիայի նախագահ Ռեջեփ Թայիփ Էրդողանը կոչ է արել միջազգային հանրությանը դադարեցնել «աննախադեպ դաժանությունը» Գազայի հատվածում, ՅՈՒՆԻՍԵՖ-ը խստորեն դատապարտել է միջադեպը, կոչ է արել պաշտպանել բոլոր խաղաղ բնակիչներին և խնդրել հումանիտար մուտք գործել պաղեստինյան անկլավ, Սաուդյան Արաբիայի արտաքին գործերի նախարարությունը հիվանդանոցի վրա հարձակումն Իսրայելի կողմից անվանել է «զզվելի հանցագործություն»:

 

ԵՄ արտաքին քաղաքականության պատասխանատու Ժոզեպ Բորելն էլ սա համարում է «սարսափելի հանցագործություն» և կոչ է անում «մեղադրողներին պատասխանատվության ենթարկել», ԱՀԿ-ն ևս դատապարտել է հիվանդանոցի ավիահարվածը, պաշտոնական Սիրիան Գազայի հատվածի հարձակման համար մեղադրել է Արևմուտքին, ԿԽՄԿ-ն հիշեցրել է, որ հիվանդանոցները պետք է պաշտպանված լինեն, ՄԱԿ-ում մի խումբ արաբական երկրներ պահանջել են հրադադար հաստատել Գազայում, ՌԴ Անվտանգության խորհրդի փոխնախագահ Դմիտրի Մեդվեդևը հիվանդանոցի վրա հարձակումն անվանել է հրեշավոր պատերազմական հանցագործություն, որի պատասխանատվությունը կրում է Միացյալ Նահանգները։

 

Մեծ Բրիտանիան հայտարարել է, որ կաշխատի իր դաշնակիցների հետ՝ պարզելու հարձակման հանգամանքները, Մարոկկոն, Կատարը, ԱՄԷ-ն և Վենեսուելան դատապարտել են իսրայելական հարձակումը հիվանդանոցի վրա:

 

Հիվանդանոցի ավերման մեղավորները պետք է պատասխանատվության ենթարկվեն, Ժնևում հայտարարել է ՄԱԿ-ի մարդու իրավունքների գերագույն հանձնակատար Ֆոլքեր Թյուրքը, ՄԱԿ-ի գլխավոր քարտուղար Անտոնիո Գուտերեշը դատապարտել է հարվածը՝ հիշեցնելով, որ հիվանդանոցներն ու բուժանձնակազմը պաշտպանված են միջազգային մարդասիրական իրավունքի համաձայն, ԱՄՆ նախագահ Ջո Բայդենը օգնականներին հանձնարարել է տվյալներ հավաքել՝ պարզելու հարձակման հանգամանքները, Իրանի նախագահ Էբրահիմ Ռաիսին հիվանդանոցի վրա հարձակումն անվանել է ռազմական հանցագործություն՝ դրա համար մեղադրելով ԱՄՆ-ին և Իսրայելին։ Երկիրը սուգ է հայտարարել հարձակման զոհերի հիշատակին։

 

Ալժիրը հիվանդանոցի վրա Իսրայելի հարձակումն անվանել է դիտավորյալ, Եվրահանձնաժողովի ղեկավար Ուրսուլա ֆոն դեր Լեյենը հայտարարել է, որ Գազայի հատվածում հիվանդանոցի վրա հարձակման համար «ոչ մի արդարացում» չկա և կոչ է արել մեղավորներին պատասխանատվության ենթարկել, Կուբայի նախագահ Միգել Դիաս-Կանելը հարձակման համար պատասխանատու է համարում Իսրայելին:

 

Ռուսաստանն առաջարկել է լրացնել Մերձավոր Արևելքի վերաբերյալ ՄԱԿ-ի Անվտանգության խորհրդի բանաձևի բրազիլական նախագիծը՝ դատապարտելով հիվանդանոցի վրա հարձակումը, Չինաստանը միացել է հարվածի կապակցությամբ ՄԱԿ-ի Անվտանգության խորհրդի բաց նիստ անցկացնելու Ռուսաստանի և Արաբական Միացյալ Էմիրությունների խնդրանքին, Տոկիոն ևս վրդովված է Գազայի հիվանդանոցի վրա հարձակումից, հայտարարել է Ճապոնիայի արտգործնախարար Յոկո Կամիկավան։

 

Աղբյուր՝ armtimes.com