ՀՀ վարչապետը «Արմօյլ» ՓԲԸ-ի գործունեության հետ կապված խնդիրն ուսումնասիրելու համար աշխատանքային խումբ է ստեղծել
ՀՀ վարչապետ Նիկոլ Փաշինյանը որոշել է միջգերատեսչական աշխատանքային խումբ ստեղծել, որը կուսումնասիրի «Արմօյլ» փակ բաժնետիրական ընկերության տնտեսական գործունեության հետ կապված խնդիրը։ Միջգերատեսչական աշխատանքային խմբի ղեկավարը կլինի ՀՀ քաղաքաշինության կոմիտեի նախագահ Արմեն Ղուլարյանը։ Խմբի կազմում կլինեն, ՀՀ արտակարգ իրավիճակների նախարարի, ՀՀ շրջակա միջավայրի նախարարի, Քաղաքաշինության, տեխնիկական և հրդեհային անվտանգության տեսչական մարմնի, Բնապահպանության և ընդերքի տեսչական մարմնի, Առողջապահական և աշխատանքի տեսչական մարմնի, Սննդամթերքի անվտանգության տեսչական մարմնի, ՀՀ արտակարգ իրավիճակների նախարարության, ՀՀ շրջակա միջավայրի նախարարության, ՀՀ արդարադատության նախարարության իրավական ապահովման վարչության, ՀՀ քաղաքաշինության կոմիտեի միջազգային համագործակցության և կառուցապատման ներդրումային ծրագրերի վարչության բարձրաստիճան ներկայացուցիչներ։ Միջգերատեսչական աշխատանքային խմբի ղեկավարը մեկամսյա ժամկետում պետք է ՀՀ վարչապետին ներկայացնի «Արմօյլ» փակ բաժնետիրական ընկերության կառուցած գործարանի գործարկման հնարավորությունները և աշխատանքային խմբի առաջարկած համապատասխան լուծումները՝ ճանապարհային քարտեզի տեսքով: Խոսքը Եղվարդի Նատի թաղամասում գտնվող նավթամթերքի վերամշակման գործարանի մասին է, որը պետք է զբաղվեր բիտումի ու քսայուղերի արտադրությամբ: 2018թ-ի հոկտեմբերին Բնապահպանության և ընդերքի տեսչական մարմնի որոշմամբ՝ «Արմօյլը» պարտավորեցվել էր ձեռնպահ մնալ գործարանում արտադրական գործունեություն իրականացնելուց՝ մինչև շրջակա միջավայրի վրա ազդեցության գնահատման և փորձաքննության (ՇՄԱԳ) դրական եզրակացություն ստանալը: «Արմօյլի» ղեկավարությունը փորձել էր բողոքարկել այս որոշումը իրավական ճանապարհներով, բայց ապարդյուն։ Խնդիրն ավելի ուշ կարգավորվեց կառավարության մակարդակով: Վերջին տեղեկությունների համաձայն այսօր օգոստոսի 2-ին միջգերատեսչական աշխատանքային խումբը այցելել է Եղվարդի Նատի թաղամասում գտնվող «Արմօյլի» ընկերության պատկանող նավթամթերքի վերամշակման գործարան և մոտկից ուսումնասիրել պարագաները և հանդիպում ունեցել գործարանի տնօիրնության պատասխանատու մարմինների հետ։