«Արցախի հարցը չի լուծվել, ոչ մի ժամանակում էլ չի կարող լուծված լինել», խորհրդարանում լրագրողների հետ ճեպազրույցում հայտարարել է Արցախի պաշտպանության նախկին նախարար եւ Արցախի անվտանգության խորհրդի նախկին քարտուղար Սամվել Բաբայանը, որը այսօր մասնակցել է 44-օրյա պատերազմի քննիչ հանձնաժողովի նիստին եւ պատասխանել հարցերի: Բաբայանի մասնակցությունն ընթացել է փակ ռեժիմով եւ հայտնի չէ, գոնե առայժմ, թե նրան ինչ հարցեր են ուղղվել եւ ինչ պատասխաններ են հնչել: Ինչ վերաբերում է Արցախի հարցի լուծված չլինելու մասին նրա հայտարարությանը, որ հնչել է լրագրողների հետ ճեպազրույցում, ապա այստեղ թերեւս դժվար է չհամաձայնել Սամվել Բաբայանի հետ, որքան էլ այսօր կարող է թվալ, թե Արցախի հարցը լուծված է: Եվ որքան էլ այդ մասին առավել եւս տարփողի Ադրբեջանը:

Հարցը լուծված չի եղել, եւ՝ չէ: Այլ խնդիր է, որ դրա այսպես ասած «ակտիվության» կամ գոյության ռեժիմը էապես կախված է աշխարհաքաղաքական իրողություններից, աշխարհաքաղաքական հարաբերակցությունից եւ ուժերի դասավորությունից: Եվ սա ըստ էության վերաբերում է ոչ միայն Արցախի խնդրին, այլ գործնականում բոլոր այդօրինակ հակամարտություններին: Օրինակ, հաճախ է հիշատակվում Կոսովոն՝ Արցախի խնդրի համատեքստում: Իսկ Կոսովոյի հակամարտությունը լուծվա՞ծ է:Ընդամենն ամիսներ առաջ այդ հակամարտությունը կարող էր ունենալ նոր բռնկում՝ կապված Կոսովոյի հյուսիսում ապրող սերբերի իրավունքների պաշտպանության հետ: Այլ հարց է, որ այդ բռնկումը չստացավ աշխարհաքաղաքական մեծ «պահանջարկ» կամ «սնուցում»: