«Շատ գործողություններ կան, գերիների վերադարձը, միջազգային կառույցներում մեր պետության դեմ ներկայացրած իրենց հայցերը, ինչպես նաև մեր ներկայացրած հայցերը, սահմանի ճշտումը, ինչպես նաև սպասում և ակնկալում ենք, որ Ադրբեջանի նախագահը թվային առումով կհայտարարի 29 հազար 800 քառակուսի կիլոմետրի մասին»:

 

Այս մասին այսօր լրագրողերի հետ զրույցում ասաց ԱԺ նախագահ Ալեն Սիմոնյանը:

 

Հարցին, թե ի՞նչ գնով, նա պատասխանեց. «Մենք արդեն հնարավոր բոլոր գները վճարել ենք և ավել գին չեմ կարծում, որ պետք է վճարենք»:

 

Դիտարկմանը, թե հայրենիքի մի մասը, թողնելով թշնամուն, կարո՞ղ ենք մյուս մասի վրա ապրել խաղաղ, Սիմոնյանը պատասխանեց.

 

«Այդ հայրենիք արտահայտությունը այնքան վերացական է. Ադանա՞ն, Ղա՞րսը ձեր հայրենիքն է, Արցա՞խը ձեր հայրենիքն է: Կա պետություն, և կա հայրենիք հասկացություն, եթե դուք փորձում եք այդ արտահայտություններով մանիպուլյացիաներ անել, դա ուրիշ բան է: ՀՀ-ն կոնկրետ քարտեզով անկախացել է: Վա՞նը, Մո՞ւշը, մեր հայրենիքն է, թե՞ մեր հայրենիքը չէ, Էրզրո՞ւմը մեր հայրենիքն է: Ամբողջ հայկական լեռնաշխարհը իմ՝ որպես հայ մարդու, հայրենիքն է, բայց կա պետություն հասկացություն, որով մենք անկախացել ենք»,- նկատեց նա:

 

Դիտարկմանը, թե այդ քարտեզների ներսում՝ մի մասում, ադրբեջանական զորքեր են, ԱԺ խոսնակն ասաց. «Ադրբեջանի պնդմամբ՝ որոշ տեղերում նաև մենք ենք իրենց տարածքում: Կա ադրբեջանական թեզ, որ կան գյուղեր որտեղ մենք ենք իրենց տարածքում: Եթե այն քարտեզով, որով մենք անկախացել ենք, կլինեն տեղեր, որտեղ մենք Ադրբեջանի տարածքում ենք, պետք է դուրս գանք այդ տարածքից, ինչպես նաև իրենք պետք է դուրս գան մեր տարածքներից»:

 

Սիմոնյանը նկատեց՝ երբ խոսում ենք 86 հազար 600-ի մասին, դա օդում գտնվող տարածք չէ, դա նշանակում է, որ 29 հազար 800-ը Հայաստանն է. «Ասելով մեկը՝ դու ապացուցում ես մյուսը և հակառակը, խնդրում եմ, որ այդ ընկալումը լինի: Մենք մեզ համար մեր կարմիր գիծը գծել ենք և մեր երկիրը պետք է բերենք խաղաղության, և այդ թիվը, որը քննարկվում է, մեր կողմից է դրվել շրջանառության մեջ»:

 

Աղբյուր՝ armtimes.com