Հանուն Հանրապետության կուսակցության նախագահ Արման Բաբաջանյանը ֆեյսբուքյան իր էջում գրել է. Մեր հանրությանը հոգեբանական տեռորի ենթարկող Ալիևի լուսանկարներն ու տեսանյութերը տարածելու փոխարեն առաջարկում եմ կենտրոնանալ մեր անելիքի վրա։ Եռամյա աղետներից ու արհավիրքներից հետո ի՞նչ պետք է անել ոտքի կանգնելու, սթափվելու, խելքը գլուխը հավաքելու, սեփական ուժերին ապավինելու համար։

 

Մեր հանրությունը քաղաքական ու հոգեբանական կոռուպցիայի մեջ է։ Անբացատրելի, անտրամաբանական վախ ռուսներից, թուրքերից, ադրբեջանցիներից, ու ցանկացած այլ մեկից, որը մեզ հետ ուզում է գործ ունենալ։

 

Այս իրավիճակն առաջացրել է ռազմավարական պարալիզ։ Վախենում ենք զինվել, ռազմավարություն մշակել, ենթակառուցվածք ստեղծել, երկիր պահել։

Հայաստանն աշխատում է ռեակտիվ ռեժիմով՝ ընկալում է միայն դրսից եկող որոշ իմպուլսներ, սեփական իմպուլս էլ չի արձակում։

 

Տևական կամ գործնական արձագանք է տրվում հիմնականում Մոսկվայից եկող իմպուլսներին, երբեմն էլ սփյուռքի որոշ մասնավոր նախաձեռնությունների, որոնք ըստ իրենց ներդաշնակ են Մոսկվայի ցանկություններին։ Արդյունքում հողն ավազի պես շարունակում է ոտքերի տակից դուրս սողալ։ Սա պետք է փոխվի։

 

Սփյուռքի ու Հայաստանի ֆինանսական ռեսուրսները պետք է ուղղվեն այդ վախն ու պարալիզը հաղթահարելու և հանրային-պետական ռեաբիլիտացման նպատակին, որի հիմքում է
Հայաստանի անկախությունը ու տարածքային ամբողջականությունը, սեփական ռազմաքաղաքական ու տնտեսական հանձնառությունները սեփական կամքով ընտրելու կամ փոխելու ազատությունը։

 

Հայաստանյան և սփյուռքյան քաղաքական կուսակցությունները պետք է սատարեն այդ նպատակն ու իրենց քաղաքական պայքարն ուղղեն դրա իրականացմանը՝ այդտեղ մրցակցելով միմյանց հետ։

 

Ի՞նչն է մեզ պակասում սա անելու համար։

 

Աղբյուր՝ araratnews.am