ԼՂ «Միասնական հայրենիք» կուսակցության նախագահ Սամվել Բաբայանը  «Ազատություն» ռադիոկայանի եթերում հայտարարել է, որ, իր կարծիքով, ԼՂ նախագահ Արայիկ Հարությունյանը ճնշման տակ չէ, որ հրաժարական է տվել։

 

«Երկրորդը՝ անակնկալ չի եղել, որովհետև ես դրա մասին մի 10 օր առաջ ասել եմ իմ հարցազրույցներում, որ Հարությունյանը պետք է գնա, այլընտրանք չունի, որովհետև քաղաքական և որևիցե դրսի ուժ նրան չի սատարում, չի փորձում հետը խնդիրներ լուծել, և նա պարտադրված է լինելու գնալ: Եվ ստեղծված իրավիճակը, որ քաղաքական լուծումների չեն գնում, չեն նստում և խոսում, դա բերել է ճգնաժամի, և նա պարտավոր էր հեռանալ, այլընտրանք էլ չուներ: Հիմա, թե ինչքանով է ինքը ձևակերպում, որ իրեն պարտադրել են, դա արդեն այլ խնդիր է»,- ասել է Բաբայանը:

 

 

Խոսելով այն մասին, թե կարծիքներ կան, որ հրաժարական տալու համար նախագահին ստիպել են ԼՂ նախկին և ՀՀ 2-րդ և 3-րդ նախագահները, իսկ Հարությունյանը պայմանավորվել է Բակո Սահակյանի և Արկադի Ղուկասյանի հետ ու նման որոշում կայացրել՝ Բաբայանը նկատել է․

 

«Ես դրա մասին վերջերս հայտարարությունն էի տարածել, որ Արցախում կողային պայմանավորվածություններ են ձեռք բերվում երեք հոգով, կարելի է և Հայաստանից ոմանք պայմանավորվեն ու Արցախում փոխեն նախագահ, բայց դա ոչ թե Արայիկ Հարությունյանին պարտադրեցին, այլ Հարությունյանն իրենցից մեկն է, դերը տվել են նրան, չկարողացավ մինչև վերջ խաղալ, փոխեցին, բերում են այլ դերակատար։ Արցախի հանրությունը ամսի 8-ին՝ ընտրությունների օրը, պետք է ցույց տա, որ երեք հոգի նկուղում չեն կարող որոշումներ կայացնել, դա փաստ է, խնդիրն այն է՝ մենք կարո՞ղ ենք դրան հասնել, թե՞ ոչ, և Արցախում այլևս չեն լինի նման ձևի որոշումներ, սրա մասին պետք է բոլորս մտածենք»։

 

Աղբյուր՝ armtimes.com