Մենք ներկա ենք Սյունիքում և շարունակելու ենք աջակցել Հայաստանին՝ իրականացնելով տարբեր նախագծեր. ԵՄ դեսպան
ԵՄ գրասենյակը գերմանական կողմի մասնակցությամբ Հայաստանում իրականացնում է մասնավոր ծրագրեր՝ համոզված լինելով, որ համատեղ աշխատանքը կարող է տալ սպասված արդյունք և կողմերին դարձնել ավելի ուժեղ։
Գերմանիայի համագործակցությունը շատ երկրների հետ ընդգրկում է կոնկրետ ոլորտներ, որոնցից առաջնայինը մարդու հիմնարար իրավունքների պաշտպանությունն է։ Գերմանիան ներգրավված է նաև հայ-ադրբեջանական հակամարտության կարգավորման գործընթացում։ ԵՄ գրասենյակը գերմանական կողմի մասնակցությամբ Հայաստանում իրականացնում է մասնավոր ծրագրեր՝ համոզված լինելով, որ համատեղ աշխատանքը կարող է տալ սպասված արդյունք և կողմերին դարձնել ավելի ուժեղ։
«Արմենպրես»-ի տեղեկացմամբ՝ Գյոթեի անվան հայ-գերմանական կենտրոնում կազմակերպված «Փոփոխություններ Գերմանիայի արտաքին և զարգացման քաղաքականության մեջ. ինչո՞վ են դրանք հետաքրքիր Հայաստանի համար» թեմայով քննարկման ժամանակ նման կարծիք հայտնեց Հայաստանում ԵՄ դեսպան Անդրեա Վիկտորինը։
«Մենք ներկա ենք Սյունիքում և շարունակելու ենք աջակցել Հայաստանին՝ իրականացնելով տարբեր նախագծեր», - ասաց դեսպանը։
Նրա դիտարկմամբ՝ ԵՄ անդամ երկրները համատեղ ջանքերով են կառուցում համաեվրոպական քաղաքականությունը՝ ներդնելով իրենց կարողություններն ու ներուժը, հետևաբար Գերմանիայի արտաքին քաղաքականության մեջ առկա բազում տարրեր կարելի է տեսնել եվրոպական ընդհանուր քաղաքականության մեջ։ Գործընկեր երկրներին օժանդակելը բխում է ԵՄ գրասենյակին տրված մանդատից։ Եվրոպական նախաձեռնություններն ակտիվորեն իրականացվում են նաև Հայաստանում։ Դրանցից մեկն էլ, ԵՄ դեսպանի հիշատակմամբ, Սյունիքի մարզում իրականացվող մեծ ծրագիրն է, որի միջոցով ապահովվում են անհրաժեշտ ներդրումներ։
Գերմանիայի խորհրդարանի՝ Բունդեսթագի պատգամավոր Մերլե Շպելլերբերգն իր հերթին նշեց, որ Գերմանիայի արտաքին քաղաքականության մեջ տեղի ունեցող փոփոխությունները շրջադարձային են և կապված են աշխարհաքաղաքական գործընթացների ու էներգակիրների պաշարների օգտագործման հետ։ Գերմանիայի արտաքին քաղաքականությունն այսօր կենտրոնացած է նաև գլոբալ կլիմայական փոփոխություններով պայմանավորված բնապահպանական խնդիրների վրա, որոնք առնչվում են մոլորակի բոլոր տարածաշրջաններին։ Այդուհանդերձ մեծածավալ զարգացումների ֆոնին՝ քաղաքացիական հասարակության, ժողովրդավարության և համապարփակ անվտանգության հետ կապված ավանդական հարցերը նախկինի պես գտնվում են Գերմանիայի կողմից վարվող քաղաքականության առանցքում։
Քննարկման մասնակից ՀՀ ԱԳՆ Եվրոպայի վարչության պետ Արա Մարգարյանն անդրադառնալով հայ-գերմանական հարաբերություններին՝ մասնավորապես ասաց, որ մենք միշտ ստերեոտիպային մոտեցում ենք ունեցել Գերմանիայի արտաքին քաղաքականության վերաբերյալ, սակայն նոր սերնդի գործիչներն առաջնորդվում են ժամանակակից չափանիշներով, նոր աշխարհայացքով, ինչը կարելի է կիրառել ներհայաստանյան պայմաններում, երբ խոսք է գնում արդեն մեր քաղաքականության ուղենիշների մասին։
«Վերջին շրջանում ականատես եղանք նոր շրջադարձերի, որոնց ազդակները տրվեցին բարձրաստիճան պաշտոնյաների այցերով։ Հիշատակման արժանի են ՀՀ վարչապետի, նախագահի և արտգործնախարարի այցերը, որոնք արտացոլեցին հայ-գերմանական հարաբերությունների խորքային բնույթը և ևս մեկ անգամ առիթ դարձան՝ ավելի ընդլայնելու երկկողմ հարաբերությունները»,- ասաց Մարգարյանը։
Ըստ նրա՝ հայկական կողմը մեծապես գնահատում է Գերմանիայի կանցլեր Օլաֆ Շոլցի անհատական ջանքերն՝ ուղղված հայ-ադրբեջանական հակամարտության կարգավորմանը։ Այդ համատեքստում բավականին արդյունավետ ստացվեց կանցլերի, Եվրախորհրդի նախագահ Շառլ Միշելի, Ֆրանսիայի նախագահ Էմանուել Մակրոնի միջնորդությամբ և Հայաստանի վարչապետ Նիկոլ Փաշինյանի ու Ադրբեջանի նախագահ Էլհամ Ալիևի մասնակցությամբ հնգակողմ հանդիպումը Մոլդովայում կայացած Եվրոպական քաղաքական համայնքի գագաթնաժողովի շրջանակում։
ՀՀ ԱԳՆ ներկայացուցչի համոզմամբ՝ Գերմանիան ոչ միայն ԵՄ առանցքային երկրներից է, այլև մեծ կշիռ ունի ամբողջ աշխարհում, հետևաբար կարող է իր հեղինակությունն ու ներուժն օգտագործելով՝ մեզ ավելի մոտեցնել համապարփակ խաղաղության ու կայունության։ 2018 թվականից ի վեր Հայաստանն իրականացնում է արմատական բարեփոխումներ և այդ գործում զգում է Գերմանիայի անվերապահ աջակցությունն ու Հայաստանին հետայսու նույնպես օգնելու պատրաստակամությունը, ինչն անկասկած կնպաստի հայ ժողովրդի հետագա բարգավաճմանը։
«Հայաստանը ԳԴՀ-ի հետ զարգացնում է ոչ միայն երկկողմ հարաբերություններ, այլև դիտարկում է նրան որպես կարևոր գործընկեր՝ ԵՄ-ում Հայաստանի ինտեգրումը խթանելու և կենսական որոշումներ կայացնելու գործում էական դերակատարություն ունենալու առումով։ Հայաստանն ու Գերմանիան կարող են առկա աշխարհաքաղաքական փոփոխությունների համատեքստում համատեղ գործողություններով դիմակայել հարաճուն մարտահրավերներին»,- եզրափակեց Մարգարյանը։
Նմանատիպ Լուրեր
ԱՄՆ ևս 14 նահանգ հետևել է Կոլորադոյի օրինակին և արգելել Թրամփին մասնակցելու ԱՄՆ նախագահի ընտրություններին
Նախօրեին հայտնի է դարձել, որ Կոլորադոյի Գերագույն դատարանն արգելել է Դոնալդ Թրամփին մասնակցել փրայմերիզներին։
«Աշխատանքները նախ կսկսվեն Հայաստանի հետ»․ Իրան-ԵԱՏՄ ազատ առևտրի համաձայնագրի ստորագրումը՝ օրեր անց
Դեկտեմբերի 25-ին կստորագրվի Իրան-ԵԱՏՄ ազատ առևտրի համաձայնագիրը։ Իրանական կողմի փոխանցմամբ՝ արտոնությունների հետ կապված աշխատանքները նախ կսկսվեն Հայաստանի հետ։ Փոխադարձ առևտրում մաքսատուրքից կազատվեն ՀՀ–ից Իրան արտահանման առաջնային հետաքրություն ներկայացնող ապրանքները։
Եթե ռումբերը չոչնչացնեն Գազայի հատվածի բնակչությանը, սովն ու հիվանդությունները կանեն․ «Բժիշկներ առանց սահմանների» կազմակերպություն
«Բժիշկներ առանց սահմանների» միջազգային մարդասիրական կազմակերպությունը դատապարտել է Գազայի հատվածում «միջազգային մարդասիրական իրավունքի կոպտագույն խախտումը», Իսպանիայում հայտարարել է հասարակական կազմակերպության գլխավոր տնօրեն Մարտա Կանյասը։
ԱՄՆ-ն ընդլայնել է ռուսական ընկերությունների դեմ պատժամիջոցները
ԱՄՆ-ն ընդլայնել է պատժամիջոցները ռուսական չորս ընկերությունների և նավթամթերք տեղափոխող տանկերի նկատմամբ:
ԱՄՆ-Թուրքիա հարաբերությունները դժգոհություն են առաջացրել հունական կողմում
Հունաստան-Ամերիկա առաջնորդության խորհրդի գործադիր տնօրեն Էնդի Զեմենդիեսը թուրք-հունական հարաբերություններում նկատվող դրական դինամիկայի ֆոնին բողոք պարունակող նամակ է ուղարկել ԱՄՆ-ի պետքարտուղարություն։
Մակրոնը միգրացիայի մասին աղմկահարույց օրենքն ուղարկում է Սահմանադրական խորհուրդ
Ֆրանսիայի Ազգային ժողովի (խորհրդարանի ստորին պալատ) կողմից դեկտեմբերի 19-ին ընդունված ներգաղթի կանոնները խստացնելու մասին օրինագիծը նախագահ Էմանուել Մակրոնի որոշմամբ կներկայացվի Սահմանադրական խորհրդի հաստատմանը։ «Արմենպրես»-ի փոխանցմամբ՝ այս մասին նախարարների խորհրդի նիստից հետո ճեպազրույցում ասել է նախարարների կաբինետի պաշտոնական ներկայացուցիչ Օլիվյե Վերանը։
