Այս մասին նա ասաց՝ պատասխանելով քննիչ հանձնաժողովի անդամների հետևյալ հարցին․

 

 

«Ըստ քննիչ հանձնաժողովի տիրապետած տեղեկությունների՝ 2019 թվականի մարտի 12-ին ՀՀ-ի և Արցախի համատեղ անվտանգության նիստի ժամանակ Դուք բաց տեքստով ասել եք, որ մենք գնում ենք պատերազմի՝ կա՛մ հողերը հանձնենք, կա՛մ էլ կռվենք, որին ի պատասխան՝ զինված ուժերի ծանրակշիռ մեծամասնությունը պնդել է՝ պետք է կռվել։ Ըստ որոշ տեղեկությունների՝ նույնաբովանդակ հարց հնչել է 2016 թվականի վերջին ՀՀ երրորդ նախագահի՝ Արցախի ռազմաքաղաքական ղեկավարության հետ հանդիպման ժամանակ։ Եթե դա ճիշտ է, ըստ Ձեզ՝ ո՞րն է եղել ՀՀ-ի և Արցախի զինված ուժերի ոչ իրատեսական պատկերացնումների դրդապատճառները»։

Կառավարության ղեկավարը նշեց․ «Պետք է անկեղծ ասեմ, որ համատեղ նիստից այդպիսի դրվագ ես չեմ հիշում։ Նիստից բացի՝ տարբեր քննարկումներ են եղել, այնպես չի եղել, որ նիստը եղավ, ավարտվեց, ցտեսություն, գնացինք տներով։ Ենթադրում եմ, որ այս հարցը տալիս եք, ուրեմն այդպիսի խոսակցություն եղել է։ Ես չեմ հիշում, բայց այլ բանի եմ ուզում անդրադառնալ․ այդ իրատեսական և ոչ իրատեսական պատկերացումներն էլ պետք է գնահատենք։ Օրինակ՝ եթե պարզվի, որ պատերազմի ընթացքում եղել են բարձրաստիճան զինվորականներ, որոնք բանակի շարքերում խուճապ են տարածել, դա կազդի այդ իրատեսականի և ոչ իրատեսականի վրա։

Ես գիտեմ, որ մենք դեպք ունենք, երբ ռազմավարական բարձրունքը ադրբեջանական կողմից գրավման, հետո նորից մեր զորքերից ետ գրավման, բայց հետո մեր հրամանատարներից մեկը հրամայել է թողնել բարձունքը, այդ գործը դատարանում է, ինչո՞ւ է հնչել նման հրաման։ Մենք քրեական գործ ունենք, որն այն մասին է, երբ բարձրաստիճան սպան խուճապ է տարածել, ասել է՝ գնացեք զորքերին ասեք՝ հողերը տված է, անիմաստ է, քաշվեք ստեղից։ Կան դրվագներ, որոնց ես անձամբ եմ առնչվել, երբ որ ինքս վերջին պահին տեղեկացել եմ մի տարածք հանձնելու որոշման մասին, որին ես նախ արգելել եմ այդ բանը անել, բայց այդ որոշման խորհուրդը ապօրինի միջամտությամբ տվել է մի շատ բարձրաստիճան զինվորական, որը հարց է, թե ինչքանո՞վ ուներ այդ իրավասությունը՝ նման խորհուրդ տալով բունկերում գտնվելով, բայց այդ տարածքը հայկական վերահսկողության ներքո է։

Ի՞նչի են նման հրամաններ հնչել, չգիտենք»։

Այնուհետև վարչապետը նորից վերադարձավ այն հարցին, թե բանակցային գործընթացի վրա որքանո՞վ են ազդել ներքաղաքական իրադարձությունները․ «Շատ դրվագներ կան պատերազմի հետ կապված, որ այն, ինչ տեղի է ունեցել պատերազմի դաշտում, դրանց նպատակը Հայաստանում իշխանափոխություն կազմակերպելն էր։ Անկեղծ ասում եմ՝ մինչև պատերազմի ավարտը ես ինձ թույլ չեմ տվել իմ մտքով նման բաներ անցկացնել, բայց հետագայում սկսում եմ մտածել դրա մասին, այդ վարկածը խորացել է Սոթք-Խոզնավար դեպքից հետո, մեղադրանք կա, մեղադրյալ կա, բայց պատճառը չկա»։

 

Աղբյուր՝ armtimes.com