Կողմերն այդ մասին հայտարարել են մարտի 10-ին: Իրանական «Թասնիմ» գործակալությունը հայտնում է, որ Իրանի և ՍԱ անվտանգության խորհուրդների քարտուղարները մի քանի օր բանակցություն են վարել Պեկինում, ինչի արդյունքում հայտարարել են  հարաբերությունը վերականգնելու պայմանավորվածության մասին՝ առավելագույնը երկու ամսվա ընթացքում: Իրանն ու Սաուդյան Արաբիան այդ համաձայնությանը միջնորդելու համար շնորհակալություն են հայտնել Չինաստանի նախագահ Ցզինպինին:

 

Ի դեպ, հատկանշական է, որ դա տեղի է ունենում Սի Ցզինպինի՝ Չինաստանի նախագահի պաշըոնում երրորդ ժամկետով նշանակվելու կամ վերընտրվելու որոշմանը զուգահեռ, որ կայացրել էր ժողովրդական ներկայացուցիչների համաչինական Ժողովը: Դա աննախադեպ որոշում էր, քանի որ Չինաստանի որևէ նախագահ չի պաշտոնավարել երկու ժամկետից ավելի: Սի Ցզինպինի նախագահության ընթացքում ստեղծվեց երրորդ ժամկետի իրավական հնարավորությունը և այն փաստորեն արդեն իրացվել է, տալով գնահատականների առիթ, որ նախագահ Սին փաստացի գնում է «կայսերական» տրամաբանությամբ կառավարման, որն իր արտացոլումն է ունենալու նաև Չինաստանի աշխարհաքաղաքական հավակնությունների տեսքով: Եվ ահա, հատկանշական և որոշակի առումով նաև խորհրդանշական է, որ Սի Ցզինպինի երրորդ ժամկետի մեկնարկին զուգահեռ, հայտարարվում է Չինաստանի միջնորդությամբ Իրան-Սաուդյան Արաբիա համաձայնության մասին: Իսկ դա ոչ միայն լայն ռեգիոնալ, այլ գործնականում աշխարհաքաղաքական նշանակության իրողություն է, հաշվի առնելով Թեհրանի և Էր Ռիյադի դերակատարումը:

 

Նրանց միջև հարաբերությունը խաթարվել էր 2015 թվականից հետո, երբ Սաուդյան Արաբիան ռազմական գործողություններ սկսեց Եմենի դեմ: Իրանում եղան բողոքի ցույցեր և հարձակումներ ՍԱ դեսպանատան դեմ: Դա բերեց երկու երկրների լարվածության և դիվանագիտական հարաբերությունների խզման: 2021 թվականից Իրաքի վարչապետի նախաձեռնությամբ սկսեց աշխատանք հարաբերությունը վերականգնելու ուղղությամբ, որը փաստորեն մոտ երկու տարի անց հաջողությամբ է ավարտվում Չինաստանի միջնորդությամբ: Իհարկե դեռևս պետք է հետևել, թե որքանով ամուր կլինի նախաձեռնությունն ու կիրացվի ամբողջությամբ, քանի որ կասկած չկա, որ կլինեն դրա խաթարման թե ռեգիոնալ, թե աշխարհաքաղաքական փորձեր:

 

Իրան-Սաւդյան Արաբիա համաձայնության ամրացումը կլինի Չինաստանի իրապես խոշոր դիվանագիտական, տնտեսա-քաղաքական ձեռքբերում, որը կամրացնի Պեկինի դիրքը բավականին մեծ կորագծով: Ընդ որում ուշագրավ է, որ համաձայնությունը ձեռք է բերվում Իրանի նախագահի՝ Չինաստան կատարած նշանակալի այցից մի քանի շաբաթ անց, և մի քանի ամիս անց՝ Չինաստանի նախագահի Սաուդյան Արաբիա կատարած պատմական այցից, որտեղ նա ունեցավ թե երկկողմ հանդիպումներ, թե հանդիպումներ արաբական երկրների ձևաչափով:  Ավելորդ է թերևս խոսել այն մասին, որ տեղի ունեցողը խորքային նշանակություն է ունենալու նաև Հայաստանի համար: Այդ համատեքստում ուշագրավ է թերևս այն, որ հայտարարված համաձայնությանը զուգահեռ Եգիպտոոսում տեղի էր ունենում Արաբական լիգայի արտգործնախարարների հավաքը, որին մասնակցում էր նաև Հայաստանի արտգործնախարար Միրզոյանը: