«Պատիվ ունեմ» խմբակցության ղեկավար, Հայրենիք կուսակցության նախագահ, ԱԱԾ նախկին պետ Արթուր Վանեցյանը հայտարարել է խորհրդարանական մանդատը վայր դնելու, ինչպես նաև ՀՀԿ հետ դաշինքի դե յուրե և դե ֆակտո դադարեցնելու մասին: Այլ կերպ ասած, «Պատիվ ունեմ» այլևս գոյություն չունի, եթե իհարկե Արթուր Վանեցյանը չփոխի որոշումը: Առայժմ նա իհարկե մնում է խոսքի տերը, այսինքն վայր է դնում մանդատը այն բանից հետո, երբ մոտ երկամսյա պայքարը այդպես էլ չավարտվեց իշխանափոխությամբ: Վանեցյանը հայտարարել էր, որ, Փաշինյանին չհեռացնելու դեպքում ինքն այլևս չի վերադառնա խորհրդարան: Այդպես էլ անում է և այս դեպքի համար իհարկե կարելի է ասել, որ պահում է պատիվը՝ «Պատիվ ունեմ» դաշինքը քանդելու գնով: Սակայն, Արթուր Վանեցյանի որոշումը «Պատիվ ունեմ» դաշինքին չէ, որ հարվածում է: «Պատիվ ունեմ» դաշինքը խորհրդարանում և փողոցում ամենևին առաջին ուժը չէր: Առաջին ուժը «Հայաստան» դաշինքն էր՝ Ռոբերտ Քոչարյանի և ՀՅԴ կազմած, ու Արթուր Վանեցյանը գործնականում հարվածում է «Հայաստան» դաշինքին, որը ներկայումս փորձում է իր համախոհների առաջ փրկել դեմքը՝ վրանները հավաքելու որոշումից հետո:
Արթուր Վանեցյանն իր մանդատը վայր դնելու որոշումով «Հայաստան» դաշինքի համար բավականին բարդացնում է իր համակիրների կամ ընտրազանգվածի մոտ դեմք փրկելու գործընթացը: Իսկ այդ խնդիրը առավել սուր է հենց այն ուժի համար, որը դիտարկում էր իրեն ընդդիմություն-նախկին կառավարող համակարգի լոկոմոտիվ և կառավարիչ, հավակնում ամրանալ այդ դերում կամ կարգավիճակում: Արթուր Վանեցյանի որոշումը այդ իմաստով է, որ դե ֆակտո հարվածում է ոչ թե «Պատիվ ունեմ» դաշինքին, որը մեծ հաշվով ոչինչ չի էլ կորցնում, այլ «Հայաստան» դաշինքին և Ռոբերտ Քոչարյանին: Սա իհարկե ներընդդիմադիր այն պայքարի , առաջնորդության համար մրցակցության տրամաբանության շրջանակում է, որի մասին խոսել եմ բազմիցս: Դեռևս նախորդ տարի հունիսին խորհրդարանի արտահերթ ընտրությունից հետո արտահայտել եմ կարծիքս, որ «Հայաստան» և «Պատիվ ունեմ» դաշինքները իրավիճակային ձևաչափեր են, որոնք հենց ընտրությունից հետո իմաստազրկվելու են իբրև քաղաքական ծրագիր կամ նախագիծ, քանի որ թե Հայաստանում, թե նաև աշխարհում՝ անխուսափելիորեն փոխվելու է իրավիճակ: Եվ ահա, ընտրությունից մեկ տարի անց առկա է մի ձևաչափի կազմալուծում՝«Պատիվ ունեմ»-ի և մյուսի համար բավականին բարդ իրադրության ստեղծում, որովհետև «Հայաստան» դաշինքի համար բարդացնելով «դեմք փրկելու» խնդիրը, Արթուր Վանեցյանը փաստորեն կամա, թե ակամա խթանում է նաև խմորումներ այդ դաշինքի ներսում, կամ առավել սրում արդեն եղածը, այդ կերպ բարձրացնելով նաև այդ դաշինքի կազմալուծման գործընթացների հավանականությունը կամ արագացնելով դրանք: Խորհրդարանական ընդդիմության հետպատերազմյան փազլը գործնականում քանդվում է, զուգահեռ ընթացող՝ նորի համար պայքարով:
Աղբյուր՝ 1in.am
Նմանատիպ Լուրեր
