ինչ կլինի ընդդիմության հետագա քաղաքական ճակատագիրը
«Հայկական ժամանակի» հետ զրույցում անդրադառնալով ընդդիմության՝ Ֆրանսիայի հրապարակից վրանները հանելու որոշմանը՝ ասում է քաղաքագետ Հակոբ Բադալյանը:
Նրա համոզմամբ՝ խորհրդարանական ընդդիմությունը խնդիրներ ունի թե՛ իր դիրքերը ամրապնդելու, թե՛ ներսում:
«Ընդդիմությունը հիմա պատրաստվում է քաղաքական նոր շրջափուլերի, դա կլինի նոր ընտրությունների տեսքով կամ միջազգային այնպիսի զարգացումներով, որը ՀՀ-ում կարող է տարբեր իրավիճակների հանգեցնել»,- կարծում է Բադալյանը:
Հարցադրմանը՝ ՀՀ-ում նոր ընտրությունների կարի՞ք տեսնում է, քաղաքագետը նշում է. «Հաջորդ ընտրությանը պատրաստվում են տեղի ունեցած ընտրությունից անմիջապես հետո: 2021-ի արտահերթ խորհրդարանական ընտրություններին թե՛ «Հայաստան» դաշինքը, թե՛ «Պատիվ ունեմ»-ը իրավիճակային դաշինքներ էին: Ընտրություններից հետո նրանք արդեն իրենց առջև պետք է դնեն նոր փուլերին պատրաստվելը և մարտահրավերներ ընդունելը: Այս քաղաքական դաշինքները պետք է հայտնվեին վերանայումների հրամայականի առջև»:
Բադալյանի խոսքով՝ կապ չունի, թե ինչպես է հասարակությունը վերաբերվում Ռոբերտ Քոչարյանին և Սերժ Սարգսյանին. վերջիններս իրենց հնարավորությունները բավական սթափ գիտակցող գործիչներ են: «Նրանք պատկերացնում էին, որ այսօր գալ իշխանության, այն էլ՝ փողոցային պայքարի միջոցով, գործնականում անհնար է: Չեմ էլ կարծում, թե նրանց նպատակը փողոցով իշխանության գալն էր»,- ասում է զրուցակիցը:
Անդրադառնալով այն նկատառումներին, թե այս պայքարի ձախողմամբ ընդդիմությունը հուսախաբ արեց իրեն վստահողներին և հնարավոր է, որ հաջորդ խորհրդարանում այլևս չլինեն, քաղաքագետը նկատում է՝ կլինեն. «Իրենց ընտրազանգվածը կայուն է, և դա թույլ է տալու նվազագույն շեմը հաղթահարել: Ամեն դեպքում այս հարցն էլ կախված է նրանից, թե վաղը կամ մի քանի տարի անց Հայաստանի քաղաքական դաշտում ինչ նոր ուժեր կհայտնվեն ու կլինե՞ն կենսունակ, թե՞ ոչ: Եթե այս պահի դրությամբ ենք խոսում, ապա՝ այո՛, նրանք ի վիճակի են կրկին հայտնվել խորհրդարանում»:
Սերժ Սարգսյանի՝ Իշխան Սաղաթելյանին շարժման լիդեր կարգելու հայտարարության մասին խոսելիս էլ՝ զրուցակիցը նշում է՝ Սարգսյանը սրանով ակնարկում է, որ ինքը որևէ կերպ չի խանգարել «Հայաստան» խմբակցության և դրա առանցքը կազմող ուժերի հավակնություններին լինել առաջնորդի դիրքում:
«Սերժ Սարգսյանը ցույց տվեց, որ ինքը պատասխանատվություն չի կրում այդ դաշինքի առաջնորդած շարժման անարդյունավետության կամ անհաջողության համար: Շարժման մեջ այսպիսի դիրքորոշումները շատ են եղել: Հիշում ենք, որ «Պատիվ ունեմ» խմբակցության ղեկավար Արթուր Վանեցյանը հայտարարեց, թե շարժման մեջ կան մարդիկ, որոնց ներկայության հետ ինքն այդքան էլ համամիտ չէ: Արմեն Աշոտյանի տելեգրամյան ալիքում ձայնագրություն տարածվեց, որտեղ Նաիրա Զոհրաբյանն ասում էր, թե մարդկանց վանում է Ռոբերտ Քոչարյանի ներկայությունը: Այս ամենը վկայում է՝ ընդդիմության ներսում հարաբերությունները չափազանց բարդ են: Խոսուն էր նաև այն փաստը, որ Սերժ Սարգսյանն ու Ռոբերտ Քոչարյանը այս երկամսյա պայքարի ընթացքում այդպես էլ կողք կողքի չհայտնվեցին»,- նկատում է նա:
Խոսելով ընդդիմության՝ խորհրդարան վերադառնալու մասին՝ քաղաքագետը ասում է՝ կապ չունի կգնա՞ն, թե՞ ոչ, դրանից քաղաքական կյանքի որակը գրեթե չի փոխվելու:
armtimes.com
Անյուտա Աթանեսյան