Այսպիսի քայլերը կարող են զսպիչ դեր ունենալ. որ դեպքում Հայաստանը կարող է դիմել ՄԱԿ-ի ԱԽ
Հայաստանի Արտաքին գործերի նախարարի խոսնակը, ի պատասխան բազմաթիվ հորդորներին և հարցմանը, թե նոյեմբերի 16-ին Հայաստանի արևելյան մասում Ադրբեջանի կողմից ինքնիշխան տարածք ներխուժելու հիման վրա՝ արդյոք Հայաստանը վերջապես չի պատրաստվո՞ւմ դիմել ՄԱԿ-ի ԱԽ, նշել է, որ Հայաստանը իր տարածքային ամբողջականությունը և ինքնիշխանությունը պաշտպանելու համար դիտարկում է միջազգային իրավունքի և դիվանագիտական պրակտիկայի բոլոր գործիքների կիրառումը,այդ թվում՝ ՀԱՊԿ-ից բացի՝ ՄԱԿ-ի անվտանգության խորհուրդ դիմելը,որի նախագահին արդեն իսկ տեղեկացրել են վերջին օրերին Ադրբեջանի կողմից Հայաստանի տարածքային ամբողջականության դեմ զինված հարձակումների մասին, ինչը ոտնահարում է ՄԱԿ-ի կանոնադրությունը, միջազգային իրավունքը: Իսկ մինչ այդ նոյեմբերի 16-ին ՄԱԿ-ում մեր մշտական ներկայացուցիչն էր ելույթ ունեցել, որում բարձրաձայնել է Ադրբեջանի ագրեսիայի մասին և կոչ էր արել, որ միջազգային դերակատարների կողմից հրատապ և արդյունավետ քայլեր ձեռնարկվեն՝ հետագա սրացումը կանխարգելելու և Հայաստանի տարածքից Ադրբեջանի զինված ուժերի անվերապահ և ամբողջական դուրսբերումն ապահովելու նպատակով։
«ԱԳՆ հայտարարությունը և ՄԱԿ –ում մեր մշտական ներկայացուցչի ելույթը դեռ պաշտոնական դիմում չեն, քանի որ այն ենթադրում է կոնկրետ փաստերի, ապացույցների ամբողջական հավաքագրման իրականացում, նախապես դիվանագիտական և իրավական պատրաստվածություն, մշտական անդամ երկրների հետ լուրջ աշխատանք, որպեսզի չխափանեն որոշման ընդունումը։ Ինչ վերաբերում է, թե դրանք ազդարարո՞ւմ են ՄԱԿ-ի անվտանգության խորհուրդ դիմելու գործընթացի մեկնարկի մասին, հաստատ պատասխան չեմ կարող տալ, քանի որ այդ հարցին կարող են պատասխանել միայն այդ մարմինները»,-«Առաջին լրատվականի» հետ զրույցում նշեց միջազգային իրավունքի մասնագետ Արա Ղազարյանը:
Ըստ նրա՝ այսպիսի քայլերը, սակայն, կարող են քաղաքական առումով զսպիչ դեր ունենալ: Հարցին՝ ինչ սպասելիքներ կարող ենք ունենալ հարցի բարձրացումով՝ իրավագետը կարծում է՝ սա դեռ ոչ այնքան մեծ, սահմանային միջադեպ է, որպեսզի անվտանգության խորհրդը հրատապ նիստ հրավիրի և քննի խնդիրը, բայց եթե Ադրբեջանը մեծացնի էսկալացիայի մասշտաբները, հայկական կողմը կարող է արդեն հատուկ դիմումով ներկայացնել, որի հիման վրա՝ հնարավոր է ՄԱԿ անվտանգության խորհուրդը արագ ու հրատապ նիստ գումարի՝ էքսպանսիան կանխելու միջոցներ կիրառելու նպատակով։
Ղազարյանի կարծիքով՝ հայկական կողմի դիրքորոշումը ընդհանուր առմամբ այն տրամաբանությամբ է, որ միջադեպի հետ կապված նախ՝ հավանաբար կդիմենք ՀԱՊԿ-ին, քանի որ դա Հայաստանի պայմանագրային ռեգիոնալ պաշտպանության մեխանիզմն է, ապա արդյունքի չհասնելու դեպքում կփորձենք օգտվել ՄԱԿ-ի մանդատից։
Հեղինակ՝ Թամարա Ղազարյան