Փաշինյան. Ռուսաստանից առաջարկներ ենք ստացել
Երեւան: Մեդիամաքս: ՀՀ վարչապետ Նիկոլ Փաշինյանն այսօր ասել է, որ երեկվա իր հայտարարությունից հետո ՌԴ պաշտպանության նախարարը դեմարկացիայի եւ դելիմիտացիայի նախապատրաստական փուլի վերաբերյալ հանդես է եկել առաջարկություններով:
«Ուզում եմ վերահաստատել, որ այդ առաջարկությունները մեզ համար ընդունելի են»,- ասել է նա:
Կառավարության նիստում Նիկոլ Փաշինյանը ՀՀ պաշտպանության նախարար Սուրեն Պապիկյանին առաջարկել է ռուսաստանցի գործընկերոջ հետ ճշգրտել մանրամասները եւ փորձել իրագործել առաջարկները:
Նոյեմբերի 17-ին վարչապետն Ազգային Ժողովում, մասնավորապես, ասել էր.
«Ես դեռեւս 2021 թվականի մայիսին կառավարության նիստում հայտարարել եմ, որ պատրաստ եմ ստորագրել այդ պահին սեղանին դրված առաջարկությունը՝ դեմարկացիայի եւ դելիմիտացիայի գործընթաց սկսելու վերաբերյալ: Մայիսին եւ դրանից հետո Ռուսաստանը երեք անգամ հանդես է եկել առաջարկով, եւ բոլոր երեք անգամները մենք համաձայնություն ենք տվել այդ գործընթացով գնալ առաջ: Կարծում եմ, որ սահմանային իրադրության խաղաղ հանգուցալուծումը չափազանց կարեւոր է եւ նախկինում մեր արած առաջարկություններն ուժի մեջ են, այդ թվում՝ դելիմիտացիայի եւ դեմարկացիայի գործընթաց սկսելու վերաբերյալ»։
Նմանատիպ Լուրեր
