Արցախը իր չէ, առարկա չէ, որ հանձնես կամ չհանձնես. Նիկոլ Փաշինյանը՝ Արցախը «հանձնելու» լուրերի մասին
Նիկոլ Փաշինյանն ասաց. «Մենք հույս ունենք, որ ԼՂ-ում ՌԴ խաղաղապահ զորախումբը կապահովի ադրբեջանական ստորաբաժանումների լիարժեք դուրսբերումը»:
ԼՂ հիմնախնդրի կարգավորմանն առնչվող իմ մոսկովյան բանակցությունների բովանդակության մասին աշխատանքային կարգով տեղյակ եմ պահել ԼՂ նախագահին: Այս մասին այսօր՝ ապրիլի 22-ին, Կառավարության հերթական նիստում հայտարարեց ՀՀ վարչապետ Նիկոլ Փաշինյանը:
«Գործնականում իմ ամեն օտարերկրյա այցից առաջ բոլոր հնարավոր ռեսուրսներով լուրեր են տարածվում, թե պատրաստվում եմ ԼՂ հարցի կարգավորման վերաբերյալ ինչ-որ փաստաթուղթ ստորագրել, որով Արցախը պիտի հանձնվի Ադրբեջանին: Պատասխանատու կերպով ասում եմ՝ այս ընթացքում չի եղել և չկա ԼՂ կարգավորման ոչ մի նախագիծ կամ սևագիր, որը սեղանի վրա լինի կամ շրջանառության մեջ դրված լինի»,- ասաց վարչապետը:
Նիկոլ Փաշինյանը հավելեց. «Արցախը իր չէ, առարկա չէ, որ հանձնես կամ չհանձնես: Արցախը այնտեղ ապրող մարդն է: Եթե մենք Արցախը հանձնող լինեինք, 44-օրյա պատերազմից հետո տասնյակ միլիարդավոր դրամներ չէինք ծախսի, որ ապահովեինք արցախցիների վերադարձը իրենց տներ: Արցախը հանձնողը պատերազմից հետո ոչինչ չէր ձեռնարկի: Արցախը պահել նշանակում է արցախցուն պահել Արցախում, Հայաստանը պահել նշանակում է հայաստանցուն պահել Հայաստանում, դեռ մի բան էլ հեռացածներին վերադարձնել»:
Ապրիլի 22-ին, Կառավարության հերթական նիստում ՀՀ վարչապետ Նիկոլ Փաշինյանը, ներկայացնելով Ռուսաստանի Դաշնություն իր պաշտոնական այցի արդյունքները, նշեց. «Հաջորդ արդյունքը ԼՂ հիմնախնդրի կարգավորման համատեքստում ԵԱՀԿ Մինսկի խմբի համանախագահության միջազգային մանդատի կարևորության ընդգծումն էր՝ սրանից բխող քաղաքական հետևանքներով»:
Նշելով, որ Հայաստան էին այցելել ԵԱՀԿ Մինսկի խմբի Ռուսաստանի, Ֆրանսիայի և ԱՄՆ համանախագահողները, Նիկոլ Փաշինյանն ընդգծեց. «Կարող ենք ասել, որ ԵԱՀԿ ՄԽ համանախագահության լուծարման մասին գնահատականները հիմնավորված չեն»:
Նրա խոսքով՝ բոլոր համանախագահողները ԼՂ հիմնահարցի կարգավորման իրենց մանդատին հավատարիմ են մնում՝ չնայած այն հանգամանքին, որ Ուկրաինայում ծավալվող իրադարձությունները նրանց գործողությունների համար դժվարություններ են ստեղծել:
Կարևորելով Լաչինի միջանցքի անարգել և անխափան գործունեությունը՝ Նիկոլ Փաշինյանը անուրանալի համարեց ՌԴ խաղաղապահ զորախմբի ներդրումը:
Անդրադառնալով Փառուխի դեպքերին՝ Նիկոլ Փաշինյանն ասաց. «Մենք հույս ունենք, որ ԼՂ-ում ՌԴ խաղաղապահ զորախումբը կապահովի ադրբեջանական ստորաբաժանումների լիարժեք դուրսբերումը»:
ՀՀ վարչապետը հավելեց, որ ԼՂ հիմնախնդրի կարգավորմանն առնչվող իր մոսկովյան բանակցությունների բովանդակության մասին աշխատանքային կարգով տեղյակ է պահել ԼՂ նախագահին:
Նմանատիպ Լուրեր
