ՀՀ ԱԳ նախարար Արարատ Միրզոյանը երեկ հանդիպումներ է ունեցել Մինսկի խմբի համանախագահ երկրների՝ ՌԴ, ԱՄՆ եւ Ֆրանսիայի դեսպանների հետ
Նա հանդիպել է նաեւ ՄԽ ռուս համանախագահի հետ։
Քննարկման թեմաների վերաբերյալ պաշտոնական հաղորդագրություններն ուշագրավ են։ ՌԴ դեսպան Կոպիրկինի եւ ՄԽ ռուս համանախագահ Խովաեւի հետ Արարատ Միրզոյանը խոսել է Արցախի Ասկերանի շրջանում Բաքվի ներխուժման, Արցախում հումանիտար ճգնաժամ ստեղծելու, քաղաքացիական բնակչությանը թիրախավորելու և էթնիկ զտմանն ուղղված ադրբեջանական կողմի այլ գործողությունների մասին։ Նա «ընդգծել է Բաքվի ստորաբաժանումների՝ մարտի 23-ի ելման դիրքեր վերադարձի անհրաժեշտությունը»։
ԱՄՆ դեսպան Լին Թրեյսիի հետ Արարատ Միրզոյանը խոսել է Արցախում ստեղծված իրավիճակի մասին եւ «գնահատելով Ադրբեջանի ագրեսիվ գործողություններին ԱՄՆ կողմից տրված գնահատականը՝ ընդգծել գործուն քայլերի իրականացման անհրաժեշտությունն իրավիճակի դեէսկալացիայի ուղղությամբ, կարևորել միջազգային հանրության կողմից խնդրի հետևողական հասցեագրումը»։
Ֆրանսիայի դեսպան Անն Լույոյի հետ հանդիպմանը նույնպես Արարատ Միրզոյանը խոսել է Արցախում ստեղծված իրավիճակի մասին եւ «կարևորել է ստեղծված իրավիճակի վերաբերյալ միջազգային հանրության պատշաճ և հասցեական արձագանքը՝ ուղղված Լեռնային Ղարաբաղի տարածքից ադրբեջանական զինուժի դուրսբերմանը և իրավիճակի դեէսկալացիային»։
Ինչպես նկատում ենք, Արարատ Միրզոյանը կատարել է պահանջների «թեմատիկ բաժանում»։ Ընդ որում, Ֆրանսիայի դեսպանի հետ զրույցում ԱԳ նախարարը խոսել է «Լեռնային Ղարաբաղի տարածքից ադրբեջանական զինուժի դուրսբերման» մասին։
Հիշեցնենք, որ Ֆրանսիայի խորհրդարանի զույգ պալատներում ընդունվել է Արցախի ճանաչման անհրաժեշտության մասին բանաձեւ, որում խոսք է գնում ընդհանրապես իրավիճակը 1994-ի շփման գծին վերադարձնելու մասին՝ բանակցային գործընթացը սկսելու համար։ Դա՞ նկատի ուներ Արարատ Միրզոյանը, նշելով, որ Բաքվի զինուժը պետք է դուրա բերվի Լեռնային Ղարաբաղի տարածքից։