Նախիջեւանի քննարկում․ Թեհրանն ու Բաքուն համաձայնե՞լ են
Ադրբեջանի և Իրանի միջև լարվածության փուլը, որը տեղի է ունեցել հրապարակային հարթակներում, ավարտվել է, հայտարարել է Իրանի արտգործնախարար Հոսեյն Ամիր Աբդոլլահյանը։ «Մենք շփումներ ենք ունեցել Ադրբեջանի արտաքին գործերի նախարարի հետ։ Կարծում եմ, որ մեր ունեցած խնդիրները աստիճանաբար կլուծվեն»։
Հիշեցնենք, որ Իրանի և Բաքվի միջև լարվածությունը սկսվեց այն բանից հետո, երբ Բաքվի զինվորականները փակեցին Հայաստանում Գորիս-Կապան ճանապարհը, ձերբակալեցին երկու իրանցի վարորդների և սկսեցին իրանական բեռնատարներից գանձումներ կատարել։ Իրանն իր հյուսիսային սահմաններին անցկացրեց ամենամեծ զորավարժությունները և կոշտացրեց հռետորաբանությունը: Հետագայում Բաքուն ազատ արձակեց ձերբակալված վարորդներին, իսկ Իրանը հորդորեց վարորդներին չգնալ Լաչինի միջանցքով:
Ի՞նչ են պայմանավորվել Թեհրանն ու Բաքուն։ Հայաստանում Իրանի դեսպան Զոհուրին ևս մեկ անգամ նշել է Հնդկական օվկիանոսից, Չաբահար նավահանգստից և Պարսից ծոցից դեպի Սև ծով ճանապարհի կարևորությունը։ Այդ երթուղում նա ներառել է «Նախիջևան-Հայաստան-Վրաստան երկաթուղին»։
Սա նորություն է, քանի որ հրապարակայնորեն «Հյուսիս-Հարավ» նախագիծը Հայաստանով ենթադրում էր ավտոմոբիլային ճանապարհ Մեղրիից մինչև Վրաստանի սահման: Փաստորեն, հիմա խոսում են Նախիջևանով երկաթգծի բացման մասին։
Հարավային երկաթուղու վերականգնման հարցը քննարկվում է եռակողմ աշխատանքային խմբի շրջանակներում, ասել է Հայաստանի փոխվարչապետ Մհեր Գրիգորյանը։ Անդրադառնալով «Կոմերսանտ»-ի հրապարակած քարտեզին՝ Գրիգորյանը նշել է, որ դրանում նշվում է հարավային սահմանով երկաթուղու համատեղ անցման տարբերակը։
Այժմ աշխատանքային խումբը քննարկում է նախկին ԽՍՀՄ հարավային սահմանի երկայնքով, մասնավորապես, Երևանի, Նախիջևանի և Մեղրիի միջև երկաթգծի բացումը, որն այնուհետև ձգվելու է դեպի արևելք, ասել է նա։
Սա նշանակո՞ւմ է, որ նախնական պայմանավորվածություններ կան Նախիջևանով երկաթուղային կապ բացելու մասին, Մեղրիի միջանցքի դիմաց։ Արդյոք սա նշանակում է, որ երկու երկաթուղիները «կհատվեն» Նախիջևանում։ Եվ ո՞րն է Հայաստանի շահը։
«Մենք հուսով ենք, որ Իրանը խելամիտ կգործի։ Այդ դեպքում նա խնդիրներ չի ունենա Ադրբեջանի հետ, ասել է Թուրքիայի նախագահ Ռեջեփ Էրդողանը։
«Կարծում եմ՝ միջանցքների տրամաբանությունը և միջանցքային հռետորաբանությունը սրում են թշնամական մթնոլորտը տարածաշրջանում։ 2020 թվականի նոյեմբերի 9-ի հայտարարության 9-րդ կետում մենք հստակ նշել ենք, որ պետք է բացվեն բոլոր տարածաշրջանային տնտեսական և տրանսպորտային կոմունիկացիաները, և մենք հավատարիմ ենք այս տրամաբանությանը։ Սա նշանակում է, որ երբեմնի գոյություն ունեցող երկաթուղիները պետք է բացվեն որոշակի կարգով», խորհրդարանում հայտարարել է Նիկոլ Փաշինյանը։
Սա կարելի է մեկնաբանել որպես Նախիջեւանից Մեղրի ճանապարհ կառուցելու Հայաստանի համաձայնություն։ Ի՞նչ կարգավիճակով է գործելու այս ճանապարհը՝ Հայաստանի իրավասության ներքո՞, թե դառնալու է նոր Դանցիգ։
lragir.am
Նմանատիպ Լուրեր
