ՀՀ վարչապետ Նիկոլ Փաշինյանը նշեց, որ այս որոշմամբ իրենք հերթական ֆինանսավորումն են իրականացնում մարզերում: Նա նշեց, որ իրենց համար աշխատանքների կատարումը, վերահսկումը շատ կարևոր է: Նիկոլ Փաշինյանը թվարկեց իրականացվող և իրականացված ծրագրերը և նկատեց, որ դրանց թվում են նախընտրական խոստումները, ինչպես նաև էներգաարդյունավետության ծրագրերն իրենց ուշադրության ներքո պետք է լինեն: «Ես ուզում եմ բոլորի ուշադրությունը հրավիրել այս ծրագրի վրա, որովհետև չափազանց կարևոր ծրագիր է, որն ունի բազմաֆունկցիոնալ նշանակություն և նաև սոցիալական վիճակի բարելավման առումով է շատ կարևոր»,- ասաց նա և նշեց, որ այսպիսի ծրագրերը սոցիալական վիճակի համար ծանրակշիռ ներդրում են, քանի որ մարդկանց երկարաժամկետ կյանքի որակն է փոխում: Նիկոլ Փաշինյանն ասաց, որ մինչև 2026 թվականը 500 մանկապարտեզ կառուցելու խնդիր են դրել, և ներկա թվերը ցույց են տալիս, որ մինչև 2026 թվականը նույնիսկ 500-ից ավելի շատ կկառուցեն և հիմա դպրոցների վրա պետք է կենտրոնանալ: «Ես ուզում եմ՝ մենք մի բան պայմանավորվենք, որ 2022 թվականին 100 նոր դպրոց պետք է ունենանք»,- ասաց նա: Տարածքային կառավարման և ենթակառուցվածքների նախարար Գնել Սանոսյանը նաև համայնքների խոշորացման ծրագրերի արդյունավետության մասին խոսեց և ներկայացրեց իրականացվող ծրագրերը: Մանրամասները՝ տեսանյութում։ 23 Փետրվար, 2022 11:42