Տևական խաղաղության հասնելու համար հարևանների հետ կոմունիկացիոն գործընթաց սկսելն անխուսափելի է. Անդրանիկ Քոչարյան
ՀՀ ազգային ժողովի «Քաղաքացիական պայմանագիր» խմբակցության պատգամավոր Անդրանիկ Քոչարյանը տևական խաղաղության հասնելու համար անխուսափելի է համարում հարևան պետությունների հետ կոմունիկացիոն գործընթացի սկսումը, կարևորում է նաև ներքին միասնականությունը:
ՀՀ ազգային ժողովի «Քաղաքացիական պայմանագիր» խմբակցության պատգամավոր Անդրանիկ Քոչարյանը տևական խաղաղության հասնելու համար անխուսափելի է համարում հարևան պետությունների հետ կոմունիկացիոն գործընթացի սկսումը, կարևորում է նաև ներքին միասնականությունը: «Արմենպրես»-ի հաղորդմամբ՝ Քոչարյանը նման տեսակետ հայտնեց ԱԺ հայտարարությունների ժամին:
«Ներկայիս աշխարհաքաղաքական դինամիկ վտանգավոր զարգացումների պայմաններում մեր պետությունը չի կարող դիմակայել առանց ռազմավարական գործընկերների և հարևան պետությունների հետ հստակ կանոնակարգված հարաբերություններ ձեռք բերելու: Ակնհայտ է, որ դարեր շարունակ կայսերական նկրտումներ ունեցած պետության գենետիկ հիշողությունը ժամանակ առ ժամանակ հարմար միջավայր ստեղծվելուն պես գլուխ է բարձրացնում, սակայն մեզ համար կարևոր է նման դեպքերում արժանի դիմադրություն կազմակերպելը»,-ասաց Քոչարյանն ու կտրուկ փոփոխվող քաղաքական իրողություններում անհրաժեշտ համարեց ճկունություն ցուցաբերելը:
Նա ընդգծեց, որ Արցախի 2020-ի պատերազմը պատճառել է անդառնալի մարդկային կորուստներ, որոնց ցավը բոլորիսն է պատկանում, սակայն նաև տվել է հնարավորություն՝ ապրելու, ստեղծելու, արարելու, վերարժևելու կյանքն ու ժամանակը: «Այժմ մեր խնդիր է Կովկասի տարածաշրջանի հիմնական խաղացողների քայլերը հասկանալ, դրանք վերլուծել, լինելով իրատես՝ զերծ մնալ կործանարար մեծամտությունից, ավելորդ հուզականությունից և այս պահին թերևս անհիմն ինքնավստահությունից: Տևական խաղաղության հասնելու համար անխուսափելի է հարևանների հետ կոմունիկացիոն գործընթացի սկսումը, որքան էլ պարտված լինելու հանգամանքը մեզ համար խոչընդոտներ է ստեղծելու»,-ասաց պատգամավորը:
Նա շեշտեց՝ անցյալում կատարվածից դասեր քաղելով՝ Հայաստանը կկենտրոնացնի իր ազգային, գիտական ներուժը, կփորձի սկիզբ դնել տեղական մրցունակ սպառազինության արտադրությանը: Քոչարյանն այս պահին կարևորեց նաև երկիրը ներքին ցնցումներից և բզկտումներից զերծ պահելը՝շեշտը դնելով արտաքին հավասարակշռված քաղաքականության ձևավորման և կայունության ամրապնդման վրա: «Երկարատև խաղաղության հաստատման և պետության անվտանգության լիակատար ապահովման համար մեզ պետք է միասնականություն, սառը բանականություն և խոհեմություն ցուցաբերել՝ չմոռանալով անցյալը: Սա է առաջ շարժվելու և նշանակալի հաջողություններ գրանցելու ամենաարդյունավետ ճանապարհը»,-եզրափակեց Քոչարյանը:
Նմանատիպ Լուրեր
