«100 գաղափար Հայաստանի համար» մրցույթի նպատակը մեկն է՝ գտնել նոր լուծումներ հին խնդիրներին. Գոհար Մամիկոնյան
«100 գաղափար Հայաստանի համար» մրցույթը երիտասարդական ծրագիր է, որը կազմակերպվում է ԿԳՄՍ նախարարության կողմից գիտությամբ զբաղվող երիտասարդների շրջանում հետաքրքրություն առաջացնելու և նորարարական գաղափարներ առաջարկելու համար:
«100 գաղափար Հայաստանի համար» մրցույթը երիտասարդական ծրագիր է, որը կազմակերպվում է ԿԳՄՍ նախարարության կողմից գիտությամբ զբաղվող երիտասարդների շրջանում հետաքրքրություն առաջացնելու և նորարարական գաղափարներ առաջարկելու համար: Մրցույթն ունի ավելի քան 20 անվանակարգ, որոնք ներառում են տարբեր ոլորտներ:
«Արմենպրես»-ի հետ զրույցում ՀՀ ԿԳՄՍ նախարարության երիտասարդական քաղաքականության լրացուցիչ և շարունակական կրթության պետ Գոհար Մամիկոնյանը նշեց, որ նպատակը այդ ուղղություններով նորարարական լուծումներ ստանալն է:
«Եթե կա խնդիր հասարակությունում, ապա երիտասարդը, որը զբաղվում է գիտությամբ, մեր դիտարկմամբ պետք է զբաղվի այդ խնդիրների լուծմամբ : Եվ մենք խրախուսում ենք, որ մեզ դիմեն բոլոր ուղղություններով և ներկայացնեն իրենց պատկերացումներն ու գաղափարները: Այն տարբերակները, որոնք կլինեն շատ հետաքրքիր, մենք կուղղորդենք համապատասխան գերատեսչություններ, որտեղ այդ նոր գաղափարները կլուծեն առկա խնդիրները: Այս տարվա հանձնաժողովի նախագահ Արթուր Մարտիրոսյանը մրցույթի ժամանակ հենց դա էլ դրեց որպես հիմնական խնդիր, որ հանձնաժողովը ուշադրություն դարձնի այն հայտերին, որոնք նորարարական լուծումներ են առաջարկում արդի խնդիրներին»,- ասաց նա:
Գոհար Մամիկոնյանը կարևորեց այն, որ 2021 թվականին նախարարի հրամանով մրցույթի անցկացման կարգում իրականացրել են փոփոխություն, ըստ որի ծրագրի համար նախատեսված պետական միջոցների շրջանակում հինգ անվանակարգում սահմանվել է մրցանակային գումար՝ յուրաքանչյուրին 500.000-ական դրամ գումար: Նա նշեց , որ նախարարությունը փորձում է այս ուղղությունը զարգացնել և ներգրավել այլ գործընկերների, որոնք կարող են հայտերին ֆինանսավորում տրամադրել : Դրանով էր պայմանավորված այն, որ, կազմկոմիտեն ձևավորելիս, ընդգրկել են Գիտությունների ազգային ակադեմիայից ներկայացուցչի, միջազգային գործընկերներից ներկայացուցիչներ, ինչն էլ կնպաստի հետագա համագործակցությանը:
Նա, անդրադառնալով չհաղթած գաղափարներին, նշեց, որ դրանց շարքերում էլ շատ հետաքրքիր գաղափարներ կային: Մրցույթի շրջանակում նաև իրականացվում է հեռուստանախագիծ, որտեղ այդ բոլոր հետաքրքիր գաղափարները ներկայացվում են, որպեսզի նաև հանրությունը իմանա, այլ ֆինանսավորող կառույցներ իրազեկվեն գաղափարների մասին և դա լրացուցիչ ազդակ լինի մասնակիցների համար : Նախագիծը բաց է նաև սփյուռքի երիտասարդների համար. Սփյուռքից եղել են նախագծեր, որոնք մասնակցել են մրցույթին :
Գոհար Մամիկոնյանը շեշտեց՝ որպես միջոցառումը իրականացրած նախարարություն, ստանձնել են պարտավորություն յուրաքանչյուր հետաքրքիր նախագիծը ներկայացնել այդ ուղղությունը համակարգող նախարարություններ, գերատեսչություններ , ընկերություններ և խրախուսում են, որպեսզի նրանք ևս այդ գաղափարները իրենց շրջանակներում տարածեն, ուղարկն իրենց համակարգման ներքո գործող գիտահետազոտական ընկերություններ:
«Մտածում ենք, որ ծրագիրը վերանայելու, թարմացնելու կարիք ունենք: Այն մինչև այժմ շատ խորքային վերափոխման չի ենթարկվել, այժմ մտածում ենք այդ ուղղությամբ: Ժամանակն է աշխատել, ներգրավել նաև նոր մասնագետների, ձեռք բերված լավ փորձի և արված սխալների վրա վերափոխել նախագիծը, ավելի լավը դարձնել, ներգրավել ավելի շատ երիտասարդների և հետաքրքիր գաղափարներ: Նպատակը միանշանակ մեկն է՝ գտնել նոր լուծումներ հին խնդիրներին, ցանկացած ոլորտում»:
«Արմենպրես»-ը սկսելու է նոր պոդքաստային նախագիծ, որով անդրադառնալու է «100 գաղափար Հայաստանի համար» նախագծի հաղթող հինգ և եզրափակիչ փուլ անցած լավագույն գաղափարներին: Պոդքաստային նոր շարքի մեկնարկը կլինի հունվարի 22-ից սկսած՝ երկուշաբթի օրերին:
Նմանատիպ Լուրեր
