Ղազախստանի բոլոր շրջաններում, որտեղ տեղի են ունեցել անկարգություններ, իրավիճակը կայունացել է։ Այս մասին ասվում է երկրի ներքին գործերի նախարարի ժամանակավոր պաշտոնակատար Երլան Տուրգումբաևի հայտարարության մեջ, որը կիրակի տարածել է ՆԳՆ մամուլի ծառայությունը։
«Ներկայումս հակաահաբեկչական գործողությունը շարունակվում է երկրում կարգուկանոնը վերականգնելու համար: Այսօր իրավիճակը կայունացել է երկրի բոլոր շրջաններում: Իրավապահ ուժերն ազատագրել են նախկինում գրավված աքիմաթների [տեղական իշխանությունների] շենքերը: Վերականգնվում է կենսապահովման համակարգերի աշխատանքը»,-ասել է Տուրգումբաևը։
Նրա խոսքով, նախկինում առանձնապես ծանր իրավիճակ էր ստեղծվել Ալմաթիում, որտեղ հունվարի 5-ին 20 հազարանոց կազմակերպված ամբոխը փորձել էր գրավել տեղական վարչակազմի շենքը։ Նրանց հաջողվել էր ճեղքել պաշտպանության մի քանի գիծ ու ներթափանցել շենք։
«Միևնույն ժամանակ, ցուցարարներն ամենուր դրսևորեցին մասնագիտական հմտություններ։ Նրանց գտնվելու վայրերում և հարձակումից առաջ անջատվել են տեսահսկման տեսախցիկները, արգելափակվել են ճանապարհները, դիտորդներ են տեղակայվել պարագծով։ Իրենց գործողությունները համակարգելու համար նրանք օգտվել են ռադիոկայաններից»,- ասել է ՆԳ նախարարը։
Նա նշել է, որ շուրջ 800 հանցագործ գրավել է Ալմաթիի միջազգային օդանավակայանը։ Արդյունքում չեղարկվել է 60 մեկնում և 56 ժամանում, թալանվել են օդանավակայանի շենքի բոլոր խանութները և տոմսարկղերը։
Ղազախստանում զանգվածային բողոքի ցույցերը սկսվել են 2022 թվականի սկզբին. երկրի արևմուտքում գտնվող Ժանաոզեն և Ակտաու քաղաքների բնակիչները դեմ են արտահայտվել հեղուկ գազի գների կրկնակի բարձրացմանը: Ավելի ուշ բողոքի ակցիաները տարածվել են երկրի այլ քաղաքներում, այդ թվում՝ հանրապետության ամենամեծ քաղաքում՝ Ալմաթիում։
Իշխանությունները մինչև հունվարի 19-ը արտակարգ դրություն են հայտարարել ամբողջ երկրում և սկսել հակաահաբեկչական գործողություն։
Աղբյուր՝ armradio.am