Ռուսաստանի ԱԳ փոխնախարար. «Միասնական փաթեթը հղկվում է»
Երեւան: Մեդիամաքս: Ռուսաստանի փոխարտգործնախարար Անդրեյ Ռուդենկոն ասել է, որ «Հարավային Կովկասում բոլոր տնտեսական եւ տրանսպորտային կապերի ապաշրջափակումը կարեւորագույն ուղղություններից մեկն է Ադրբեջանի եւ Հայաստանի միջեւ հարաբերությունների կարգավորման աշխատանքներում»։
«Ըստ էության, խոսքը գնում է երկու երկրների համար խաղաղ գոյակցությունից կոնկրետ գործնական օգուտներ քաղելու հնարավորության մասին։ Ռուսաստանը այս գործընթացի անմիջական մասնակիցն է։ 2021 թվականի հունվարի 11-ին Մոսկվայում Ռուսաստանի, Ադրբեջանի եւ Հայաստանի ղեկավարները պայմանավորվեցին ստեղծել եռակողմ աշխատանքային խումբ՝ երեք երկրների փոխվարչապետների համատեղ նախագահությամբ։ Այս մեխանիզմի շրջանակներում կարեւոր նախապատրաստական աշխատանք է կատարվել տարածաշրջանում ինչպես երկաթուղային, այնպես էլ ավտոմոբիլային հաղորդակցության վերականգնման ուղղությամբ։ Ներկայում միասնական փաթեթը «հղկվում է»: Այդ մոտեցումը կապահովի ընդունված որոշումների կայունությունը»,- ասել է Ռուդենկոն ՏԱՍՍ-ին տված հարցազրույցում։
«Ընթացիկ համատեղ աշխատանքի համար անհրաժեշտ ազդակ են տվել նոյեմբերի 26-ին Սոչիում Ռուսաստանի, Ադրբեջանի եւ Հայաստանի ղեկավարների համապատասխան պայմանավորվածությունները։ Նախատեսում ենք հնարավորինս արագ ավարտել համատեղ ենթակառուցվածքային նախաձեռնությունների պարամետրերի մշակումն եւ կոնկրետ նախագծերի մեկնարկը»,- հավելել է ռուսաստանցի դիվանագետը։
mediamax.am
Նմանատիպ Լուրեր
