Իրանը մեզ ճանապարհ է տալիս մինչև Պարսից ծոց, նույնիսկ կարող ենք Ռուսաստան գնալ Իրանի տարածքով և Կասպից ծովով, իսկ մենք ոչինչ չենք անում
Իրանի խորհրդարանական պատվիրակությունն օրերս Երևանում էր, այցելել են նաև Թուրքիա, Իրանի ԱԳ նախարարն այցելել է Բաքու, որտեղ հայտարարել է, որ Ադրբեջանի հետ հարաբերություններում նոր գլուխ է սկսելու: Ինչպե՞ս եք գնահատում այս այցելությունները, ինչով է այս ակտիվությունը պայմանավորված:
Այս բոլոր զարգացումները ցույց են տալիս, որ իրանցիները շատ զգույշ և ուշադիր են աշխարհաքաղաքական և տարածաշրջանային փոփոխությունների հարցում: Ադրբեջանի հետ հարաբերությունները միշտ էլ մեծ ելևէջներով են եղել, հիմա էլ կարող է ինչ-որ մի բանից նորից սրվեն կամ հակառակը: Իրենք պարզապես ուզում են տարածաշրջանում չմեկուսանալ, ուշադիր լինեն, որ աշխարհաքաղաքական փոփոխությունները, որի մասին երազում են թուրքերը, տեղի չունենան:
Բաքուն Կապան-Գորիս ճանապարհին մաքսակետ է տեղադրել ու բենզալցակայան կառուցել: Կարո՞ղ ենք ասել, որ ավտոճանապարհը դեպի Նախիջևան բացվում է:
Դա չի բացառվում, որովհետև մեր կառավարությունն էլ է այդ մասին խոսում: Բոլոր դեպքերում, դա ճիշտ չէ: Եթե անգամ այդ ճանապարհը բացվում է, կարելի է դրա դիմաց շատ ավելի կարևոր մի բան ստանալ, ոչ թե այդպես սուսուփուս զիջել ու ասել՝ ինչ ուզում եք՝ արեք:
Ինչպե՞ս եք գնահատում Երասխ-Նախիջևան-Մեղրի-Հորադիզ երկաթուղու կառուցման հետ կապված հայտարարությունը:
Ես միշտ ասել եմ, որ այդ երկաթգծով Ռուսաստան գնալը Հայաստանին ոչինչ չի տալու: Չգիտես՝ բեռներդ տեղ կհասնեն, թե ոչ, մարդիկ ողջ տեղ կհասնեն, թե ոչ: Պատերազմը ոչ միայն չթուլացրեց ադրբեջանցիների հայատյացությունը, այլև կրկնակի, եռակի լկտիացել են: Մենք չենք տեսնո՞ւմ՝ ինչ է կատարվում սահմաններին: Այս իրավիճակում նման նախագծի իրականացումը, նման գումարների ծախսելն այնքան էլ արդյունավետ չէ։
Վարչապետը և իշխանության ներկայացուցիչները ոգևորված տնտեսական օգուտների մասին են խոսում:
Եթե հիշում եք, Նիկոլ Փաշինյանը ամենասկզբից էլ հայտարարում էր, որ ինչու եք հիմնականում ուշադրություն դարձնում նոյեմբերի 9-ի հայտարարության բացասական կետերի վրա, դա ենթադրում է կոմունիկացիաների բացում, որը շահավետ է Հայաստանին, սակայն ես մշտապես ասել եմ, որ հենց այդ կետը ռումբ է Հայաստանի տակ դրած: Դա այդ հայտարարության ամենավտանգավոր կետն է: Թուրքական անորակ ու էժան ապրանքները լցվելու են հայկական շուկա: Այնպես որ իրենք ոչ միայն մեր տնտեսությունը, այլև առողջությունն են քայքայելու:
Իրանի հետ Հայաստանի հարաբերություններն ինչպե՞ս եք գնահատում:
Քանի դեռ մենք Իրանի հետ խնդիրներ չունենք, մենք կարող ենք Իրանի հետ համագործակցությունը ընդլայնել, այդ թվում ենթակառուցվածքային ոլորտներում: Մենք կարող ենք վերցնել մի կուրս ու հանգիստ գնալ առաջ, բայց մենք այդպես չենք անում: Իրանը մեզ ճանապարհ է տալիս մինչև Պարսից ծոց, նույնիսկ կարող ենք Ռուսաստան գնալ Իրանի տարածքով և Կասպից ծովով: Իսկ Իրանի և Արդբեջանի միջև ի սկզբանե եղել է փոխադարձ անվստահություն, փոխադարձ մեղադրանքներ: Մենք պետք է դա օգտագործենք և էլ ավելի սերտացնենք կապերն Իրանի հետ, ինչը չենք անում:
Այս պահին ես չեմ տեսնում որևէ համատեղ նախագիծ Իրանի հետ, ասենք, այս ճանապարհը համատեղ կառուցում են, այսինչ բանը անում են: Փաստ է, որ Հայաստանի և Իրանի ռազմավարական, ազգային շահերը շատ հարցերում համընկնում են, և պետք է հազար ու մի ձև գտնել ու համագործակցել:
lragir.am