Փրկիչն ու մեղավորը․ ինչպես են ազատվում Մոսկվայի ու Անկարայի ձեռքերը նոր ոճրագործությունների համար
Հայկական գործոնը, որը Ռուսաստանում ու Թուրքիայում դիտարկվում է որպես գոյաբանական սպառնալիք, հնարավոր չէ վերացնել առանց հայերի հոգեբանությունը, աշխարհայացքը ճզմելու եւ մուրճի ու սալի արանքում փակելու։ Դրա համար ռուս-թուրքական համաձայնեցված քաղաքականություն է պետք, ինչի մասին վկայում են բազմաթիվ պատմական-քաղաքական փաստաթղթերը եւ վկայությունները՝ «դուք հարձակվում եք ու կոտորում, մենք հասնում ենք ու «փրկում»։
Ռուսաստանի ներկայության 200 տարիները հայերի բնիկ արեալի հետեւողական կրճատման, հայրենազրկման, ցեղասպանության դարաշրջանն է։ 2020-ի սեպտեմբերից Հայաստանի դեմ սկսած ռուս-թուրքական ռազմական ու հիբրիդային արշավը դրա հերթական հանգրվանն է։ Համաձայնեցված գործողությունների մասին խոստովանել են Թուրքիայի ու Ռուսաստանի առաջին դեմքերը։ Ընդ որում Մոսկվայից արդեն խոստովանում են անցյալի իրադարձություններին իրենց առնչությունը, այդ թվում՝ 1915-ի ցեղասպանությանը։ 1921-23-ի մասին ավելորդ է խոսել։
Մնացածը քարոզչության հարց է՝ ագենտուրայի, հատ-հատ ընտրված հպատակ «քաղաքական վերնախավի», զլմ-ների, փորձագետների միջոցով, որի բոլոր թեզերը պետք է բխեն ռուսական փրկչության եւ ռուսական վարկածով հակաթրքականության, հայերի մեղավորության եւ ռուսներին շնորհակալ լինելու կանխավարկածներից։
«Շնորհակալություն եմ հայտնում ՌԴ նախագահ Պուտինին, ում անմիջական ջանքերի շնորհիվ կասեցվել է թուրքական աշխարհի նկրտումները եւ պահպանվում է խաղաղություն: Մեր որոշ հայրենակիցներ Արցախում քննադատում են ռուս խաղաղապահներին մեզ համար շատ ծանր որոշ դրվագների կապակցությամբ, որի հետեւանքով մենք ունեցել ենք կորուստներ, բայց մենք պետք է նայենք ճշմարտության աչքերին եւ ասենք, որ այստեղ ավելի շատ մեղավորությունը մերն է», հայտարարել է Արցախի նախագահ Արայիկ Հարությունյանը:
Ահա այսպես ազատվում են Մոսկվայի ու Անկարայի ձեռքերը նոր ոճրագործություններ կատարելու, հայերին մատաղացուի դերում պահելու համար։ Կարեւորը՝ հայերը երախտապարտ լինեն եւ մեղավոր, ինչը հանում է իրավունքների ու պահանջների հարցը։
Այդ պարագային ինչո՞ւ են ռուսները խոստովանում Հայաստանի ու հայերի դեմ ոճրի իրենց ուղիղ ծրագրումն ու մասնակցությունը, երեւի կհարցնեն շատերը։ Արժե մտածել, քանի որ պատճառը չափազանց հետաքրքիր է, հատկապես «ռուս խաղաղապահների անժամկետ տեղակայման» ջատագովների համար։
lragir.am