Ղարաբաղյան հակամարտության խնդիրը լուծված չէ, որի մասին փաստում են համանախագահող երկրների դիրքորոշումները․ Արմինե Մարգարյան
«Ընդհանուր առմամբ՝ այստեղ կարող է լինել երկու պատճառ, որոնք ոչ թե բացառում, այլ շարունակում են միմյանց»,- Yerevanlur-ի հետ զրույցում նման տեսակետ հայտնեց ռազմաքաղաքական հարցերով փորձագետ Արմինե Մարգարյանը՝ անդրադառնալով հայ-ադրբեջանական սահմանին տիրող իրավիճակին։
«Առաջինն այն է, որ Ադրբեջանը վարում է միլիտարիստական արտաքին քաղաքականություն։ Արցախյան 44-օրյա պատերազմի արդյունքում այն ստատուս-քվոն, որը փոխվել է հօգուտ Ադրբեջանի և այդ հաջողությունը, որը Ադրբեջանը գրանցեց, այժմ իրենք հետևողականորեն գնում են այդ հաջողությունները կապիտալիզացնելու ուղղությամբ։ Ադրբեջանի համար բոլոր կարևոր հարցերը, որոնք հնարավոր չեն լինում լուծել քաղաքական ճանապարհով, կիրառվում է ուժի սպառնալիքի տարբերակով»,- ընդգծեց զրուցակիցը։
Ըստ ռազմաքաղաքական փորձագետի՝ երկրորդ պատճառն այն է, որ պատերազմի արդյունքում Ղարաբաղյան հակամարտության խնդիրը լուծված չէ, որի մասին փաստում են համանախագահող երկրների դիրքորոշումները։ Նրա համոզմամբ՝ դեռ շարունակելու ենք ականատես լինել Ադրբեջանի կողմից ուժի գործադրման և՛ Հայաստանի հետ սահմաններում, և՛ Արցախում։
«Պետք չէ բացառել ռազմական բախումները, սակայն պետք է հասկանալ, որ մեզ համար վտանգավորը ոչ միայն հնարավոր բախումներն են, այլև այն, որ Ադրբեջանն իր որդեգրած քայլերով գնում է Հայաստանը մաշեցնելու ճանապարհով՝ հնարավորություն չտալով պատերազմից հետո շունչ քաշելու, որպեսզի հնարավոր միջոցներ ձեռնարկենք վերականգնելու կորսված ռեսուրսները։ Կարևոր է այս իրավիճակում զգոն լինել․ մի կողմից՝ քաղաքական պլանավորումը պետք է հենված լինի իրատեսականության վրա, մյուս կողմից՝ չպետք է մոռացություն տանք մեր իրավունքների պաշտպանության կարևորությունը»,- նշեց Մարգարյանը։
Մարիամ Ասատրյան
yerevanlur.am
Նմանատիպ Լուրեր
