ՀԱՊԿ գլխավոր քարտուղարի այցը պետք է տեղի ունենար այն ժամանակ, երբ Հայաստանը դրա կարիքն ուներ․ Արեգ Քոչինյան
«Ստանսիլավ Զասի այցի անկարևորությունն ու ժամանակավրեպությունն ակնհայտ է։
Այդ այցը պետք է տեղի ունենար այն ժամանակ, երբ Հայաստանը դրա կարիքն ուներ և երբ իրավիճակը դուրս էր եկել վերահսկողությունից»,- Yerevanlur-ի հետ զրույցում հայտարարեց վերլուծաբան Արեգ Քոչինյանը՝ անդրադառնալով ՀԱՊԿ գլխավոր քարտուղարի Հայաստան այցին։
Ըստ նրա՝ Ստանիսլավ Զասի այցն ունի մեկ նպատակ՝ փորձել վերականգնել ՀԱՊԿ հեղինակությունը և՛ Հայաստանում, և՛ աշխարհում․ «Սա դատապարտված փորձ է, որովհետև մարդիկ մեզ մոտ հասկացել են, որ ՀԱՊԿ-ը Ռուսաստանի հետաքրքրությունների շրջանակն է, ոչ թե անվտանգային կազմակերպություն։ Աշխարհին վաղուց է հայտնի, թե ինչ կազմակերպություն է ՀԱՊԿ-ը, վառ օրինակն է այն, որ ՄԱԿ-ի կողմից որպես անվտանգային կառույց չի ճանաչվել»։
Անդրադառնալով Նիկոլ Փաշինյանի հետ հանդիպմանը, որի ընթացքում Ստանիսլավ Զասն անդրադարձավ Հայաստանի կողմից բարձրաձայնված առաջնահերթություններին, վերլուծաբանը նշեց, որ դրանք ընդամենը արարողակարգային բնույթ են կրում, քանի որ կառույցում որոշումներն իրականացվում են ոչ թե փաստաթղթերի հիման վրա, այլ պետությունների առաջին դեմքերի բանավոր և քաղաքական նպատակահարմարությունից ելնող պայմանավորվածությունների վրա։
Մարիամ Ասատրյան
yerevanlur.am
Նմանատիպ Լուրեր
