Պուտինն ասել է, թե ինչ է մնալու Ռուսաստանից․ Հայաստանի դեմ ագրեսիայի հետեւանքները ՌԴ համար
«Արդյոք ռուս ժողովուրդը, որի իրավունքների մասին դուք խոսում եք, համաձա՞յն է Ռուսաստանի փլուզմանը։ Դուք ցանկանում եք մեզ վերածել Մոսկովիայի՞։ ՆԱՏՕ-ում դա են ցանկանում», արձագանքել է Պուտինը։
Նույն օրը Պուտինի խոսնակ Պեսկովը հունական զլմ-ին հարցազրույցում նախատել էր Հունաստանին, «նրա տարածքում ՆԱՏՕ-ի եւ ԱՄՆ-ի զինվորների կենտրոնացման, Հունաստանի Ալեքսանդրապոլիս նավահանգստով դաշինքի ռազմական տեխնիկայի տեղափոխման կապակցությամբ»։ Հույն լրագրողն իր հերթին Պեսկովին հիշեցրել էր Թուրքիայի հետ ՌԴ ռազմա-քաղաքական սերտ համագործակցությունը։
ՆԱՏՕ-ի ընդլայնման թեման շոշափվել է Բայդեն-Պուտին զրույցում։ ՌԴ-ն դաշինքի ընդլայնումը բացառող փաստաթուղթ է պահանջում, զուգահեռ սրելով իրավիճակը Ուկրաինայի եւ Եվրամիության սահմաններին։ Միեւնույն ժամանակ, ակնհայտ է ՌԴ իշխանության մոտեցման ընտրովիությունն ու հետեւողականության բացակայությունը։ ՌԴ պահանջները վերաբերում են բացառապես ՌԴ արեւմտյան սահմաններին, իսկ ահա հարավային ուղղությամբ լիովին հակառակ պատկեր է։
Այստեղ Ռուսաստանը ՆԱՏՕ-ի երկրորդ բանակն ունեցող Թուրքիայի առջեւ բացել է ճանապարհը, նրա հետ համագործակցել ԱՊՀ եւ ՀԱՊԿ անդամ պետության՝ Հայաստանի դեմ ռազմական արշավում։ Ռուսաստանի հարավային սահմաններին՝ Դաղստանի հատվածում եւ Նախիջեւանում Թուրքիան տեղակայել է ռազմական ստորաբաժանումներ, այդ թվում օդուժ եւ անօդաչուներ, 2021-ի Շուշիի հռչակագրով ռազմական կոոպերացիայի մեջ ներգրավելով Բաքվին։ Թուրքիան ակտիվ զորավարժություններ է անցկացնում Կասպից ծովում, ձգվելով դեպի Ղրիմ եւ Դոնբաս։
Ռուսաստանից Մոսկովիա մնալու հեռանկարը ՆԱՏՕ-ի ընդլայնման մեջ չէ, ՆԱՏՕ-ի ընդլայնումը ՌԴ կլեպտոկրատ ռեժիմի վարած քաղաքականության հետեւանքն է։ Մասնավորապես, Հայաստանի հանդեպ ագրեսիայի հետեւանքները ՌԴ համար ներքին լուրջ խնդիրներ են առաջացնելու։ Բազմակրոն ու բազմէթնիկ երկիրը հակված է ներքին ցնցումների, եւ Մոսկովիայից անդին ահռելի տարածքները վարձակալության տալու, երկրի քաղաքական ու տնտեսական կենտրոնը Եվրասիայի խորքերը տեղափոխելու առաջարկները դրա վկայությունն են։ Ինչպես գրում է քաղաքական մեկնաբան Պավել Դալլաքյանը, ներկայում չկա մեկը, որր կայունացնի Ռուսաստանը, բացի Էրդողանից․ «թրենդի տրամաբանությունը տանում է ռուսական մարզեր, ընդհուպ Ալթայ, եւ ոչ ի պատասխան Էրդողանի Պեսկովի նշած ժամանակները։ Հետաձգեք չինարենը, սովորեք թուրքերեն»։
lragir.am