Մինչ հակամարտության վերջնական կարգավորումը Արցախում միջազգային անվտանգային երաշխիքները պետք է լինեն անժամկետ. Արտակ Բեգլարյան
Ադրբեջանի կողմից Արցախի հետ շփման գծում դիտավորյալ պարբերաբար սանձազերծվում են միջադեպեր, որպեսզի բնակչությանը պահեն վախի մթնոլորտում, մղեն արտագաղթելուն:
«Արմենպրես»–ի մամուլի սրահում հրավիրված ասուլիսում Արցախի Հանրապետության պետական նախարար Արտակ Բեգլարյանը նշեց, որ արցախցիներն ունեն ուժեղ դիմադրողականություն և աշխատանքներ կատարվում են սեփական անվտանգային երաշխիքները բարելավելու ուղղությամբ, այդ թվում, առաջնագծի կահավորման տեսանկյունից:
«Դեռ շատ մեծ աշխատանք ունենք անելու: Մինչ պատերազմը, Ադրբեջանի հետ շփման գծի երկարությունը շուրջ 200 կմ էր, հիմա դարձել է 500 կմ, որի զգալի մասը նոր առաջնագիծ է: Մեկ այլ խնդիր է Ադրբեջանի զինված ուժերի հենակետերի՝ մեր բնակավայրերին մոտիկ լինելը: Մենք հրապարակային առաջարկել ենք, որ զինված ուժերը պետք է հեռու լինեն բնակավայրերից: Դա միջազգային գործընկերների ու միջնորդների կողմից պետք է քննարկվի»,-ասաց Արտակ Բեգլարյանը:
Հետաքննական մեխանիզմները շատ կարևոր են, սակայն, ըստ Արտակ Բեգլարյանի, բավական թույլ են: Ադրբեջանն էլ որևէ ձևով ընդառաջ չի գնում մեխանիզմների ներդրման առաջարկներին:
«Կարծում եմ, որ այստեղ անելիք կա բոլոր միջազգային գործընկերների, միջնորդների համար»,-ասաց Արտակ Բեգլարյանը:
Անդրադառնալով Ադրբեջանի զինվորների կողմից արցախցիների սպանության վերջին միջադեպերին՝ Արտակ Բեգլարյանը նշեց, որ Շուշիի վերջին դեպքով պայմանավորված Ադրբեջանը նույնիսկ հանցագործի անունը չի տվել ոչ Արցախի իշխանություններին, ոչ ռուսական կողմին: Նրա խոսքով, Մարտակերտում հոկտեմբերին տրակտորի վարորդի սպանության դեպքով որևէ հետաքննություն չեն իրականացվել, որևէ պատասխանատվության միջոց չի կիրառվել հանցագործ զինծառայողի հանդեպ:
«Ղարաբաղյան հակամարտությունը պետք է լուծվի խաղաղ միջոցներով մեր իրավունքների անվերապահ ճանաչման հիման վրա, այդ թվում, ժողովրդի ինքնորոշման իրավունքի, անկախության միջազգային ճանաչման, բռնազավթված տարածքների վերադարձի հիման վրա: Սրանք այն կարմիր գծերն են, որոնք պետք է լինեն Արցախի, Հայաստանի ու ամբողջ աշխարհի հայության համար»,-ասաց Արտակ Բեգլարյանը:
Հաշվի առնելով Ադրբեջանի ապակառուցողական վարքը, ըստ Արտակ Բեգլարյանի, ակնհայտ է, որ հակամարտությունը արագ լուծում չունի: Արցախը հակված է, որ միջազգային անվտանգային երաշխիքները, այդ թվում, խաղաղապահների ներկայությունը պետք է լինի անժամկետ, մինչև հակամարտության վերջնական կարգավորումը:
Նմանատիպ Լուրեր
