Այս տարի Apple-ը մի շարք փոփոխություններ է կատարել Apple Watch խելացի ժամացույցների շարքում։ Սակայն ավելի էական փոփոխություններ, այդ թվում՝ նոր հնարավորությունների առումով, կիրականացվեն Apple Watch-ում 2024 թվականին, հայտնել է Bloomberg-ի լրագրող Մարկ Գուրմանը` նշելով, որ նոր հնարավորությունները Apple-ի խելացի ժամացույցները շատ ավելի գրավիչ կդարձնեն։

 

Նշվում է, որ Apple Watch-ի հաջորդ սերնդի առնվազն մեկ մոդելը կստանա նորացված դիզայն։ Ժամացույցի հաջորդ շարքը, ըստ լուրերի, կունենա ավելի մեծ microLED էկրան:

 

Գուրմանը ավելի վաղ գրել էր, որ Apple-ը պլանավորում է խոշոր թարմացումներ կատարել իր խելացի ժամացույցների թողարկման տասնամյակի կապակցությամբ:

 

Հաջորդ Apple Watch-ը կլինի ավելի բարակ և կարող է ունենալ ժապավեններ ամրացնելու նոր մագնիսական մեխանիզմ: Սակայն ավելի հետաքրքիր նորամուծություն կարող է լինել մի շարք բժշկական գործառույթների հայտնվելը։ Գուրմանի խոսքով՝ Apple Watch-ի հաջորդ տարբերակը կկարողանա հայտնաբերել հիպերտոնիայի նշանները՝ չափելով արյան ճնշումը դաստակի մոտ և ապնոէ:

 

Սպասվում է, որ հաջորդ սերնդի Apple Watch-ը կներկայացվի 2024 թվականի սեպտեմբերին: Նոր խելացի ժամացույցը հավանաբար կհայտարարվի iPhone 16-ի հետ մեկտեղ։

 

 

Աղբյուր՝ armradio.am