«Մեր հույսը մեզ վրա է, մեր վրա ասելով՝ նկատի ունեմ հայ ժողովրդին, այն ժողովրդավարական պրոցեսներին, որ Հայաստանում կան, այն գործընկերների վրա է, որոնք մեզ հետ համագործակցում են՝ Իրանի, Եվրամիության, ԱՄՆ-ի մեր գործընկերների, որոնք, ի տարբերություն մեր դաշնակցի, իրերը կոչում են իրենց անուններով և մեծագույն սատարում ցուցաբերում այս բարդ իրավիճակում և շարունակելու են ցուցաբերել»:

 

Այս մասին երեկ Հանրային հեռուստաընկերության «Հարցազրույց»-ի տաղավարում ասել է ԱԺ նախագահ Ալեն Սիմոնյանը՝ պատասխանելով հարցին, թե ինչո՞վ ենք մենք փակելու այն հնարավոր հարվածները, որ գալու են, ինչի՞ վրա է մեր հույսը:

 

Սիմոնյանը նկատել է՝ ինչ վերաբերում է Հայաստանի ու Ադրբեջանի փոխհարաբերություններին, ապա անձամբ իր կարծիքով շատ մոտ ենք և պատմական հնարավորություն ունենք հասնելու համաձայնության, նույնիսկ՝ կնքել խաղաղության պայմանագիր:

 

«Ես կարող եմ ասել, որ հուլիսի 15-ին կա ընդունված հայտարարություն Հայաստանի, Ադրբեջանի և Շառլ Միշելի մասնակցությամբ, որը որ երեք կարևոր կետ է արձանագրել: Առաջինը, որ Ադրբեջանը ճանաչում է Հայաստանի Հանրապետության 29,800 քառակուսի կիլոմետրը, ՀՀ-ն ճանաչում է Ադրբեջանի համապատասխան 86,600 հազար քառակուսի կիլոմետրը, և երկրները իրար նկատմամբ տարածքային պահանջներ չունեն:

 

Երկրորդ համաձայնությունը, որ գործընթացները տեղի են ունենալու Ալմա-Աթայի 1991 թվականի փաստաթղթերի հիման վրա, որը լավ իրավական հիմք է:

 

Երրորդը, որ կոմունիկացիաների բացումը տեղի է ունենում երկրների սուվերենության, իրավազորության, փոխադարձ հավասարության տրամաբանության մեջ»,- նշել է Սիմոնյանը:

 

Վերջինս նկատել է՝ հիմա մենք ինչ ճանապարհ էլ տանք, իրենք (-խմբ. նկատի ունի շահագրգիռ կողմերին՝ ՌԴ, Թուրքիա, Ադրբեջան) ասելու են «Զանգեզուրի միջանցք». «Անգամ, եթե այդ ճանապարհը Լոռիով անցնի, բայց մենք այս սկզբունքները ֆիքսել ենք, և Հայաստանը բաց է, և ճանապարհ է տրամադրում և նաև երկաթուղի: Մենք դրան պատրաստ ենք, և ես հույս ունեմ, որ Գրանադայում հոկտեմբերի 5-ին այս պատմական շանսն օգտագործենք, հավերժ պատերազմը և հավերժ այս վիճակը որևիցե մեկին ձեռք չի տալու, և մենք դրան պատրաստ ենք»: