«Իհարկե, մեզ տեղյակ են պահել, բայց որևիցե մասնակցություն չի եղել Երևանից, նույնիսկ խորհրդի մակարդակով Արցախում նախագահի ընտրության հետ որոշմանը»:
Այս մասին երեկ Հանրային հեռուստաընկերության «Հարցազրույց»-ի տաղավարում ասել է ԱԺ նախագահ Ալեն Սիմոնյանը՝ պատասխանելով հարցին, թե ԼՂ ԱԺ նախագահն ասել է, որ Փաշինյանը ծանոթ է եղել ընտրությանը և կատարվող ամեն ինչին:
«Մենք գիտեինք, և Ադրբեջանը դրա մասին բաց խոսել էր, որ նախագահի ընտրությունը իրենց համար ծանր և սադրիչ գործողություն է, և Արցախ իշխանությունները, այն մարդիկ, ովքեր ներկայացնում էին Արցախը, որոնց մեջ մտնում էին նախկին նախագահները, այդ որոշումը կայացրին: Հետագայում այն փաստաթուղթը, որի մասին պարոն Իշխանյանը խոսել է, մենք տեսել ենք, և միակ զանգը և խոսակցությունը, որ տեղի է ունեցել, վարչապետի կողմից է եղել, և այն արտահայտությունն է եղել, որ մեզ համար մտահոգիչ և անընդունելի է, որ այդ փաստաթղթի մեջ նշված է ՀՀ զինված ուժեր: Այնտեղից պատասխան է հնչել, որ մենք այս փաստաթուղթը չենք ստորագրում, այն հայտարարություն է լինելու, բայց փաստաթուղթը մեզ հետ չի համաձայնեցվել, մեր կողմից չի հաստատվել, և որևիցե միջամտություն չի եղել, անգամ՝ խորհուրդ»,- նշել է Սիմոնյանը:
Հաղորդավարի հարցին, թե ասե՞լ են ԼՂ իշխանություններին, որ չի կարելի հիմա այս ձևով նախագահ փոխել, որովհետև Ադրբեջանը բաց տեքսով ասել է, որ այդ դեպքում գործողությունների կգնա, Ալեն Սիմոնյանը պատասխանել է՝ որևիցե ներգործություն, որևիցե արտահայտություն, որը կարող է տպավորություն թողնել, որ իրեն ենք դա պարտադրել, չի արվել. «Արցախի իշխանությունները այդ նույն տեղեկություններն ունեցել են, հաճախ հենց իրենք են մեզ փոխանցել, որովհետև իրենց կապը շատ ավելի ուղիղ ու հաճախակի է եղել, և փաստաթուղթն էլ իրենք քննարկել են ռուս խաղաղապահների ղեկավարի հետ: Կրկնում եմ՝ նույնիսկ խորհուրդ բառը ՀՀ իշխանությունների կողմից չի հնչել»:
Դիտարկմանը, թե այսօր ԼՂ իշխանությունների քաղաքական համակիրները ՀՀ իշխանությանն են մեղադրում, Սիմոնյանը նշել է. «Այն, ինչ կատարվում է այսօր Երևանի փողոցներում, արտաքին ուժերի կողմից հրահրվող, մեծ սատարում ունեցող մի գործընթաց է, որին մեր համաքաղաքացիները իրենց պատասխանը տվել են, և ուզում եմ առիթն օգտագործելով՝ ասել, որ չդառնան երրորդ որևիցե երկրի գործընթացի մասնակից: Այդ գործընթացը ոչ մի կապ չունի ՀՀ-ի, ՀՀ շահերի հետ և որևիցե տեղ չի տանում և որևիցե առաջարկ չունի, միակ առաջարկը Հայաստնում իշխանափոխություն անելն է»:
Աղբյուր՝ armtimes.com