Այս մասին երեկ Հանրային հեռուստաընկերության «Հարցազրույց»-ի տաղավարում ասել է ԱԺ նախագահ Ալեն Սիմոնյանը:
«Անկախ նրանից, թե ՀՀ-ում ով կլիներ իշխանության՝ ես, դուք, Ռոբերտ Քոչարյանը, Սերժ Սարգսյանը, այս պրոցեսը լինելու էր, 2020 թվականի պատերազմը լինելու էր, որովհետև Սիրիայի պատերազմն էր սկսվել, և Ուկրաինայի պատերազմն էր գալիս, և պետք էին տնտեսական ճանապարհներ, և այդ տնտեսական ճանապարհները պետք են հիմա: Տեսեք Ռուսաստանի պես մեծ երկիրը և պատկերացրեք, որ չկա օդային ճանապարհ, չկա ծովային, երկաթուղային ճանապարհ, այդ տնտեսությունը դուրս գալու և իրեն աշխատացնելու խնդիր ունի: Եվ այդ խնդիրը այն ճանապարհն է, որը որ ՌԴ-ն կմիացնի Թուրքիային, Վրաստանի միջոցով դա անելը շատ դժվար է կամ գրեթե անհնար կամ առնվազն քիչ է, և դրա համար պետք են այլ ճանապարհներ»,- ասել է Սիմոնյանը:
Հարցին՝ նույնիսկ այդ պարագայում ճի՞շտ էր այդ ճանապարհին հակադրվել Ռուսաստանին, թե՞ նվազեցնել հնարավոր ռիսկերը, Ալեն Սիմոնյանը պատասխանել է.
«2018 թվականին, երբ որ մենք եկանք, առաջին բանը, որ մեզ հարցնում էին՝ արդյոք մենք ՀԱՊԿ-ից դո՞ւրս ենք գալու: Հաջորդ քայլով մենք միակ երկիրն էինք, որ ՌԴ-ի հետ համաձայնեցինք, ի հեճուկս միջազգային բոլոր գործընկերների, զորախումբ մտցնել Սիրիա, մենք դրա համար շատ քննադատվել ենք: Հետագայում մենք մեր բոլոր գործողությունները համաձայնեցրել ենք, քննարկել ենք ՌԴ մեր գործընկերների հետ: Իսկ այս պրոցեսը միայն 2018 թվականի՞ն է սկսվել: Բա 2016 թվականի պատերազմը. ՌԴ-ն լավ հարաբերություն չունե՞ր Սերժ Սարգսյանի, Հայաստանի հետ, բա ինչի՞ չպաշտպանեցին ռուսներն իրենց դաշնակցին: Հիմա մեզ մեղադրում են, ասում են՝ դուրս գանք Պրահյան գործընթացից, ռուսներն էլ են դա ասում: Լավ, մինչև Պրահյան համաձայնագիրը, բա՞ 2020 թվականի Խծաբերդի պատմությունը գիտեք՝ ի՞նչ է եղել: Նոյեմբերի 9-ի պայմանագրից մի քանի օր հետո ռուս զինվորականները դուրս են հրավիրում մեր զինվորականներին, որոնք հետագայում գերի են ընկնում, և մի մասը մինչև հիմա գերի է, և մեր զանգին ի պատասխան՝ ասում են՝ ոնց որ ձերոնք են նման բան ասել, ասում ենք՝ ո՞վ, ասում են՝ կճշտենք, մինչև հիմա ճշտում են: 2021 թվականի Սոթք-Խոզնավարի իրադարձությունները: Այդ ժամանակ Պրահա կա՞ր, բա ինչո՞ւ չէին ռուս խաղաղապահը և մեր հարաբերությունները դեր խաղում, ի՞նչ էին անում, զանգում էինք, ասում օգնեք, ձեր պարտականությունները կատարեք: Հետո 2020 թվականի սեպտեմբերին, որ Ջերմուկ մտան՝ ՀԱՊԿ-ի տարածք, մենք այդ ժամանակ Պրահայի մասին խոսո՞ւմ էինք, հիմա ինչո՞ւ է այս թեման գցել մեր ջեբը»:
ԱԺ նախագահը նաև նկատել է՝ այսօր ինչ է կատարվում. «9 ամիս Լաչինի միջանցքը փակ է, որը պետք է լինի ռուս խաղաղապահների հսկողության տակ: Ռուս խաղաղապահը էնտեղ հիմա ի՞նչ է անում, ուղեկցում է ադրբեջանցի զինվորներին դեպի ներս, իսկ այս ամեն ինչի մեջ մեղավոր ենք մենք, որովհետև երեք տարի զոհ տալով, տարածք տալով, խնդրվելով, հիմա երեք տարի անց ինչ-որ ձևով փորձում ենք պաշտպանել մեր երկիրը, դա՞ է մեր մեղքը»:
Աղբյուր՝ armtimes.com
Նմանատիպ Լուրեր
